Mesazhi i Papa Françeskut: Bota po injoron tragjeditë e mëdha

Kreu i Kishës Katolike, Papa Françesku, në urimin tradicional të Krishtlindjes “Urbi et Orbi”, ka paralajmëruar se bota po bëhet kaq e pandjeshme ndaj krizave dhe vuajtjeve, saqë ato që po ndodhin tani vështirë se vihen re.

Në mesazhin e tij vjetor për Ditën e Krishtlindjes, Papa vuri në dukje trazirat e vazhdueshme në Siri, Jemen dhe Irak, si dhe në zonat e Afrikës, Evropës dhe Azisë.

Gjithashtu ai tha se efektet e pandemisë kërcënuan përpjekjet për të zgjidhur konfliktet në nivel ndërkombëtar.

Mijëra besimtarë katolikë – ​​mes masave paraprake të COVID-19 – ndoqën nga sheshi i Shën Pjetrit në Vatikan fjalimin e Papës “Urbi et Orbi”, që e mbajti nga ballkoni i Bazilikës.

Papa Françesku paralajmëroi për pasojat sociale të pandemisë, duke thënë se kishte “një tendencë në rritje për t’u tërhequr për të ndaluar përpjekjet për t’u takuar me të tjerët dhe për t’i bërë gjërat së bashku”.

Ai tha se, “në nivel ndërkombëtar gjithashtu ekziston rreziku i shmangies së dialogut, rreziku që kjo krizë komplekse të çojë në marrjen e rrugëve të shkurtra në vend që të vendoset në rrugën më të gjatë” për zgjidhjen e konflikteve.

“Ne vazhdojmë të jemi dëshmitarë të një numri në rritje të konflikteve, krizave dhe mosmarrëveshjeve”, tha ai. “Këto duket se nuk mbarojnë kurrë dhe tani mezi i vëmë re”.

“Ne jemi mësuar aq shumë me ta sa tragjeditë e mëdha po kalojnë në heshtje”, tha Papa në fjalën e tij.

Ai veçoi Sirinë, Irakun dhe Jemenin “ku një tragjedi e madhe e anashkaluar nga të gjithë ka vazhduar në heshtje për vite me radhë”.

Përpos kësaj, ai u bëri thirrje njerëzve që të mbajnë parasysh tensionet e vazhdueshme midis Izraelit dhe palestinezëve, dhe krizën ekonomike dhe sociale “të pashembullt” që ka kapluar Libanin.

Duke iu kthyer Azisë, Papa i kërkoi Zotit që të ngushëllojë popullin e Afganistanit “i cili për më shumë se 40 vjet është sprovuar rëndë nga konfliktet” dhe “të mbështesë popullin e Myanmar-it, ku intoleranca dhe dhuna jo rrallë synojnë komunitetin e krishterë dhe vendet e tij të adhurimit”.

Gjithashtu u lut që paqja të vinte në konflikte në pika të tjera problematike në mbarë botën, duke përfshirë Ukrainën, Etiopinë dhe Sahelin, i cili ka qenë një vijë e parë në luftën kundër militantëve islamikë për gati një dekadë.

Më herët, Papa Françesku, i cili është 85 vjeç, shënoi natën e Krishtlindjes me meshën në Bazilikë, ku u kërkoi ndjekësve të tregojnë më shumë dhembshuri ndaj të varfërve dhe të “vlerësojnë gjërat e vogla në jetë”.

“Në këtë natë dashurie, le të kemi vetëm një frikë: atë të ofendojmë dashurinë e Zotit, ta lëndojmë atë duke përçmuar të varfrit me indiferencën tonë”, e përmbylli Papa Françesku thirrjen e tij.