Mediat kryesore botërore u bënë thirrje SHBA-ve të heqin akuzat ndaj Assange

Botimi amerikan “The New York Times” dhe katër botime evropiane – “The Guardian”, “Le Monde”, “Der Spiegel” dhe “El Pais” – u bënë thirrje autoriteteve amerikane që të heqin akuzat kundër themeluesit të Wikileaks-it, Julian Assange.

Lajmi u bë i ditur nga e përditshmja amerikane “The New York Times”.

Letra drejtuar qeverisë amerikane është firmosur nga kryeredaktorët e botimeve të përmendura.

Autorët e apelit besojnë se ndjekja penale e Assange shkel parimin e lirisë së fjalës, dhe për këtë arsye bie ndesh me kushtetutën amerikane.

Në letër thuhet se dokumentet sekrete të publikuara në platformën Wikileaks, duke përfshirë korrespondencën e diplomatëve dhe shërbimeve speciale, ndihmuan mediat për të ekspozuar thelbin e diplomacisë amerikane, duke përfshirë shkeljet e mundshme të së drejtës ndërkombëtare.

Drejtuesit e botimeve theksuan se hetimet gazetareske bazuar në dokumentet e publikuara nga Assange janë ende duke u zhvilluar.

“Publikimi nuk është krim”, këmbëngulin mediat, duke kërkuar përfundimin e ndjekjes penale të Assange dhe heqjen e akuzave ndaj tij.

Autorët e letrës theksuan se ata kritikuan dëshirën e Assange për të publikuar informacione të klasifikuara në një formë të pa redaktuar, por i konsiderojnë akuzat e ngritura kundër tij të tepruara dhe antikushtetuese.

Çështja kundër Julian Assange lidhet me publikimin nga WikiLeaks të qindra mijëra dokumenteve për luftërat në Afganistan dhe Irak, si dhe kabllograme diplomatike në 2010 dhe 2011.

Prokurorët amerikanë e akuzuan Assange me 18 akuza për spiunazh dhe keqpërdorim kompjuteri në lidhje me publikimin e dokumenteve të klasifikuara ushtarake amerikane nga WikiLeaks.

Afati maksimal i burgimit është 175 vjet.

Avokatët e Assange thonë se prokuroria është një abuzim i pushtetit i motivuar politikisht që do të mbysë lirinë e shtypit dhe do të rrezikojë gazetarët në mbarë botën.

Në janar të vitit të kaluar, gjykata britanike refuzoi ekstradimin e Assange drejt SHBA-ve.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.