Komisioni Qendror i Zgjedhjeve (KQZ) ka vendosur që më 21 prill të mbahet votimi për largimin e katër kryetarëve të komunave Veriore, përkatësisht Mitrovicë të Veriut, Zveçan, Leposaviq dhe Zubin Potok – të banuara me shumicë serbe.

Vendimi është marrë në mbledhjen që ka mbajtur KQZ-ja këtë të premte. Për caktimin e 21 prillit si datë e mbajtjes së votimeve për largimin e kryetarëve të komunave Veriore kanë votuar 8 pro, ndërsa 2 kanë abstenuar.

Rekomandimi për caktimin e 21 prillit u bë nga Sekretariati i KQZ-së, pasi që ka verifikuar nënshkrimet e dorëzuara të peticioneve nga Kuvendet Komunale të komunave përkatëse.

Nga Sekretariati i KQZ-së, që ka qenë përgjegjës për verifikimin e nënshkrimeve, bënë me dije se është arritur kërkesa prej 20 për qind të nënshkrimeve në raport me numrin e përgjithshëm të votuesve, çka i hapi rrugë votimit për largimin e krerëve të komunave Veriore.

Në fjalën e tij, kryeshefi i Sekretariatit të KQZ-së, Burim Ahmetaj, ka njoftuar se në Komunën e Leposaviqit, që udhëhiqet nga Lulzim Hetemi, peticionin për nisjen e procedurave për largimin e kryetarit e kanë nënshkruar 3 mijë e 30 persona, prej tyre, është vërtetuar se 2 mijë e 95 janë banorë të kësaj komune.

Megjithatë, ky numër ka qenë i mjaftueshëm për ta arritur 20 për qindëshin e kërkuar, e kjo shifër arrihej me 2 mijë e 689 nënshkrime.

Ndërsa, në Zubin Potok, komunë nën drejtimin e Izmir Zeqirit, nga gjithsejtë 1 mijë e 576 nënshkrime, 1 mijë e 380 janë vërtetuar se janë qytetarë me të drejtë vote. Duke pasur parasysh numrin e përgjithshëm të votuesve, në këtë komunë për ta arritur 20 për qindëshin duheshin 1 mijë 347 nënshkrime.

Sa i përket komunës që udhëheqë Ilir Peci, pra Zveçanit, u vërtetuan 1 mijë e 380 nënshkrime nga gjithsejtë 1 mijë e 834 sa ishin. Që peticioni të kalonte, në këtë komunë kërkohej që të firmosshin së paku 1 mijë 347.

Ndërsa, te Komuna më e madhe Veriore – Mitrovica e Veriut, është vërtetuar se 3 mijë e 653 nënshkrues ishin banorë me të drejtë vote nga 4 mijë e 148 sa ishin në total. Numri i nevojshëm për të kaluar peticioni ishte 3 mijë e 640.

Mbledhja e nënshkrimeve për shkarkimin e kryetarëve në katër komunat në Veri, u bë janarin e këtij viti. Këto nënshkrime ishin mbledhur në një periudhë të shkurtër kohore.

Mbledhja e nënshkrimeve për shkarkimin e kryetarëve në katër komunat në Veri, u bë janarin e këtij viti. Këto nënshkrime ishin mbledhur në një periudhë të shkurtër kohore.

Kryetarët shqiptarë të komunave Veriore, ishin zgjedhur më 23 prill të vitit të kaluar. Bojkotimi që serbët e Veriut – që janë shumicë në këtë pjesë të Kosovës – i kishin bërë këtyre zgjedhjeve, kishte bërë të mundur që për herë të parë ato komuna të udhëhiqen nga shqiptarët.

Mirëpo, ngjarjet që pasuan pas këtyre zgjedhjeve do të shkaktonin tensionet më të larta në atë pjesë të vendit. Vendimi i institucioneve kosovare për t’i instaluar në zyrat e tyre kryetarët e komunave, kishte hasur në kundërshtim të ashpër të serbëve lokalë.

Të prirë nga Lista Serbe – partia më e madhe e serbëve të Kosovës, njëherit të dirigjuarit e Beogradit – ata kishin qenë shumë të dhunshëm në protestat e 26 dhe 29 majit.

Madje, më 29 maj, si pasojë e dhunës së shkaktuar nga protestuesit serbë të Kosovës kishin mbetur të lënduar dhjetëra ushtarë të KFOR-it, kryesisht italianë dhe hungarezë.

Për situatën e krijuar në Veri, fajtore kryesore nga bashkësia ndërkombëtare ishte bërë Kosova. Për këtë, ndaj Prishtinës zyrtare Bashkimi Evropian kishte vendosur masa ndëshkuese – ende në fuqi.

Më 21 prill votohet për shkarkimin e kryetarëve në Veri