“Mbipesha dyfishon rrezikun e kancerit të mitrës te gratë”.
Është ky konkluzioni i organizatës së pavarur të kërkimit rreth kancerit në botë “Cancer Research UK” (CRUK), pas kërkimeve të bëra në Mbretërinë e Bashkuar (MB).
Prej disa kohësh, shkencëtarët dhe mjekët kanë pohuar se të qenit mbipeshë rrit rrezikun e sëmundjeve të ndryshme – rreth një në tri raste në MB (34%) janë të lidhura me peshën e tepërt.
Studiuesit e Universitetit të Bristolit kanë qenë në gjendje të hedhin më shumë dritë mbi lidhjen, si dhe shkallën e rrezikut në rritje.
Sipas tyre, për çdo pesë njësi BMI shtesë, rreziku i një gruaje për kancer endometrial rritet me 88%.
Rreziku i rritur është më i lartë se sa sugjerohet nga studimet e mëparshme dhe pasqyron statusin e peshës gjatë gjithë jetës dhe jo një pamje në kohë, e përdorur në shumicën e studimeve të tjera.
“Studime si ky përforcojnë faktin se të qenit mbipeshë është shkaku i dytë më i madh i kancerit në MB dhe mund të na ndihmojë të logjikojmë mbi arsyen”, tha Julie Sharp, shefe e informacionit shëndetësor në CRUK.
Më tej, ajo shpreh se nevojitet një dietë e ekuilibruar dhe të qenit aktiv.
“Ne tashmë e dimë se të qenit mbipeshë rrit rrezikun e zhvillimit të 13 llojeve të ndryshme të kancerit. Për të reduktuar rrezikun e kancerit, është e rëndësishme të ruani një peshë të shëndetshme, duke mbajtur një dietë të ekuilibruar dhe duke qëndruar aktiv”.
Megjithatë, sipas Sharp-it, nevojiten më shumë kërkime për të hetuar saktësisht se cilat trajtime dhe ilaçe mund të përdoren për të menaxhuar rrezikun e kancerit te njerëzit që luftojnë me obezitetin.
Mbipesha rrit rrezikun e kancerit të mitrës
Studiuesit shqyrtuan kancerin endometrial, lloji më i zakonshëm i kancerit të mitrës, i cili ndikon në rreshtimin e mitrës – endometrium.
Një në 36 gra, të cilat kanë lindur pas vitit 1960 në Mbretërinë e Bashkuar, do të diagnostikohet me kancer të mitrës gjatë jetës së tyre.
Janë ekzaminuar mostra gjenetike nga 120 mijë gra në MB, Australi, Belgjikë, Gjermani, Poloni, Suedi dhe Shtete të Bashkuara. Rreth 13 mijë prej tyre kishin kancer të mitrës.
Studiuesit shqyrtuan shënuesit e 14 tipareve që mund të lidhin obezitetin dhe kancerin e mitrës.
Ata gjetën dy hormone – insulinën e agjërimit dhe testosteronin – të cilat rrisin rrezikun ndaj kancerit të mitrës.
Duke përcaktuar se si obeziteti e rrit rrezikun, si për shembull nëpërmjet hormoneve, ekspertët shpresojnë që në të ardhmen ilaçet mund të përdoren për të ulur ose rritur nivelin e hormoneve specifike te njerëzit me rrezik më të lartë të zhvillimit të kancerit.
“Ky studim është një hap i parë interesant sesi analizat gjenetike mund të përdoren për të zbuluar saktësisht se si obeziteti shkakton kancerin dhe çfarë mund të bëhet për ta trajtuar atë”, përmbylli Emma Hazelwood, autorja kryesore e studimit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
