Marco Van Basten i rikthehet kauzës kundër offside (pozicioni jashtë loje). Ish sulmuesi i AC Milan, tashmë këshilltar i FIFA-s, që në vitin 2017 ishte përpjekur për modifikimin e këtij rregulli.
“Unë gjithmonë kam qenë kritik në lidhje me rregullin e offside” – tha ai për Sky Sports – “sepse jam i bindur që nuk është një rregull i mirë. Unë do të doja të tregoja se futbolli është i mundur edhe pa të. Në të vërtetë jam i bindur se do të ishte më mirë”.
Van Basten është i sigurt se pa offside, loja do të ishte më spektakolare.
“Futbolli është një lojë fantastike, por unë ende mendoj se duhet të bëjmë shumë më tepër për ta bërë atë më të mirë, më spektakolar, më interesant, më emocionues. Duhet të punojmë për këtë”.
Katër kampionate me Milanin, tre me Ajax, tre Kupa Evropiane, një Evropian, një seri të gjatë suksesesh dhe një ortek golash të shënuar (Marco Van Basten); sa do të kishte shënuar ai pa offside?
“Nuk është një rregull në favor të sulmuesve dhe nuk mendoj se mbrojtësit do të ishin në disavantazh – vazhdoi mjellma e Utrecht – do të ishte ndryshe, ne do të studionim metoda të tjera për t’i shënuar kundërshtarit. Pa pozicion jashtë loje ka shumë më pak probleme dhe ekipet do të gjenin, gjithsesi, zgjidhje të tjera për të bërë një ndeshje të mirë, e cila do të jetë po aq spektakolare sa tani, por pa këtë rregull të keq “.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
