Lladrovci pas bisedës me Thaçin e Selimin: Ishin ndër bisedat më emocionale në jetë

Kryetari i Drenasit, Ramiz Lladrovci, ka treguar se është telefonuar nga ish-presidenti i Kosovës, Hashim Thaçi, dhe ish-deputeti i Lëvizjes Vetëvendosje, Rexhep Selimi, bisedë kjo për të cilin është cilësuar “si ndër më emocionalet”.

Lladrovci përmes një postimi në llogarinë e tij në Facebook, ka thënë se kjo bisedë telefonike ishte e para prej se të njëjtit ndodhen në Hagë.

“Ndër bisedat e mia më emocionale në jetë, ishte biseda e sotme telefonike me miqtë e mi, Hashimin dhe Rexhepin. Bisedat ishin plot ndjeshmëri, sepse, për herë të parë prej se ndodhen në Hagë, pata rastin të flas e dëgjoj zërin e tyre”, ka shkruar i pari i Drenasit.

Për të, ish-presidenti Thaçi dhe Ushtria Çlirimtare e Kosovës, “është pjesë e pandashme e historisë tonë, krenarisë dhe dinjitetit nacional”.

Ai i ka falënderuar të dy për thirrjen, derisa theksoi se ata u mungojnë jo vetëm miqve dhe familjarëve por edhe shtetit.

“I falënderova për thirrjen miqtë e mi, Hashimin dhe Rexhën dhe iu thash se ju i mungoni jo vetëm familjeve, shokëve e miqve, por edhe Republikës së Kosovës, shtetit e shtetësisë tonë”, shtoi ai.

Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit, është konfirmuar më 26 tetor të vitit 2020 nga Gjykata Speciale.

Akuza për të gjithë është e njëjtë. Sipas prokurorisë në Speciale, themeluesit e UÇK-së kanë kryer krime në luftën e fundit, ose duke marrë pjesë ose duke i lejuar ato pasi ishin në zinxhirin komandues.

Të gjithë nga të akuzuarit i kanë mohuar kategorikisht akuzat që rëndojnë mbi ta. Ata janë deklaruar të pafajshëm në fjalimet e tyre të para në gjykatë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.