Emisari i posaçëm i Bashkimit Evropian për dialogun Kosovë-Serbi, Miroslav Lajçak pas takimit me kryeministrin e Kosovës, Albin Kurti dhe me zëvendëskryeministrin e parë, Besnik Bislimi në një prononcim të shkurt për media ka bërë të ditur se temë diskutimi kanë pasur vazhdimin e dialogut.

“Me Kurtin kemi diskutuar vazhdimin e dialogut, e po ashtu edhe për përgatitjet e takimit të radhës”, deklaroi ai.

I pyetur nëse do të takohet me presidentin e Serbisë në një takim të paparalajmëruar siç bëri me Kryeministrin e Kosovës, Albin Kurtin ai mohoi një gjë të tillë.

“Menjëherë pas këtij takimi do të marrë rrugën e kthimit për në Bruksel, por javën tjetër do takohem me presidentin serb në Shtetet e Bashkuara të Amerikës, në New York”, tha Lajçak.

Ndërkaq, për kornizën e re të kryeministrit të Serbisë Aleksandër Vuçiç, ai ka thënë se është habitur kur ka dëgjuar për një propozim të tillë.

“Ne jemi këtu për ta dërguar përpara procesin e normalizimit të marrëdhënieve mes dy vendeve dhe takimi i radhës mund të mbahet në shtator nuk jam akoma shumë i sigurt”.

Emisari i posaçëm i Bashkimit Evropian për dialogun Kosovë-Serbi, Miroslav Lajçak

Edhe zëdhënësi i Bashkimit Evropian, Peter Stano, ka treguar për Albanian Post, se vizita e befasishme e përfaqësuesit special të Bashkimit Evropian në Kosovë, Miroslav Lajçak dhe takimi i tij me kryeministrin, Albin Kurti, është brenda kornizës së punës që po bëhet në vazhdimësi në procesin e dialogut në Bruksel.

“Është pjesë e punës të Përfaqësuesit Special të Bashkimit Evropian, Miroslav Lajçak, që të udhëtojë dhe të takojë partnerët në rajon, dhe gjithashtu në Bashkimin Evropian e më tej”, tha Stano, i pyetur nga AP, përse Lajçak pa njoftuar zbarkoi në Prishtinë.

“Jo domosdoshmërisht i lajmërojmë, apo i komentojmë secilin takim pune të tij, apo ndërveprim me partnerët në rajon”, sqaroi Stano.

Kurti, do të duhej të ishte në debatin parlamentar me opozitën për grevën e nëpunësve civilë në Kosovë, por paparaljmërim u largua nga salla.

Pak më vonë u kuptua se ai është në një takim me Lajçakun.

Njoftimin, përmes llogarisë së tij në Facebook, e dha zëdhënësi i Qeverisë, Përparim Kryeziu.

“Kryeministri Kurti nga ora 14:00 po zhvillon takimin me Përfaqësuesin e Posaçëm të Bashkimit Evropian, Lajçak që po qëndron në Kosovë. Pastaj vazhdon agjendën ditore të takimeve zyrtare. Kjo është arsyeja se pse nuk mund të qëndronte më gjatë në Kuvend”, shkroi Kryeziu.

Lajçak pas takimit me Kurtin: Folëm për dialogun, me Vuçiç-in takohem javën e ardhshme në SHBA