Kurti për Washington Post: E kuptoj perëndimin, por deklaratat e tyre për paqe po inkurajojnë grupet ekstreme

Bashkimi Evropian dhe Shtetet e Bashkuara të Amerikës paraqitën kërkesa eksplicite për de-përshkallëzimin e situatës në Veri të Kosovës, megjithatë sipas kryeministrit, Albin Kurti, Kosova i plotëson kërkesat e komunitetit ndërkombëtar vetëm atëherë kur protestuesit që shkaktuan trazira në këtë pjesë të vendit shpërndahen ose arrestohen.

“Për largimin e policisë nga ndërtesat komunale duhet fillimisht që protestuesit të shpërndahen ose të arrestohen”, ka thënë Kurti në një intervistë për prestigjiozen amerikane The Washington Post.

Ditë më parë situata në Veri të Kosovës u përshkallëzua pas vendimit të Qeverisë për të vendosur kryetarët në ndërtesat e komunave të Zubin Potokut, Zveçanit dhe Leposaviqit nën asistencën e Policisë së Kosovës, pa koordinim me komunitetin ndërkombëtar.

Pjesa kryesore e bashkësisë ndërkombëtare, nga Sekretari i Shtetit të Shteteve të Bashkuara të Amerikës deri te qëndrimi i përbashkët i vendeve të QUINT-it, e cilësuan këtë veprim si vendosje e masave të dhunshme në Kosovë.

DASH-i dënoi atë çfarë ndodhi në Veri duke vënë në pikëpyetje edhe marrëdhëniet në mes të Kosovës dhe SHBA-së. Reagim pothuajse të njëjtë patën edhe ambasadorët e shteteve të QUINT-it të cilët bënë thirrje autoriteteve të Kosovës që në mënyrë imediate të tërhiqen dhe ta de-përshkallëzojnë situatën në Veri.

Kurti në një intervistë për WP thotë se e kupton që perëndimi po dëshiron të ruaj paqen.

Por, sipas tij, kur në terren ka grupe të ekstremit të djathtë e ultranacionalist të cilët janë pjesë e një regjimi autoritar shumë të rrezikshme, deklaratat që synojnë të ruajnë paqen “thjesht vazhdojnë të inkurajojnë figurat autoritare”.

Shefi i ekzekutivit kosovar më tej ka përsëritur se “SHBA-të janë aleati, miku dhe partneri ynë i domosdoshëm”.

“Ne jemi përjetësisht mirënjohës për rolin e tyre, për çlirimin dhe pavarësinë tonë, për sigurinë dhe mbrojtjen tonë, për zhvillimin dhe demokracinë tonë. Por, tani është gjithashtu koha t’u themi të vërtetën tonë demokratike autoritarëve në pushtet”, ka pohuar ai.

Qeveria e Kosovës t’u mundësojë kryetarëve të sapozgjedhur në katër komunat veriore të kryejnë detyrat e tyre në ndërtesa alternative dhe të tërheqë njësinë speciale të Kosovës nga ndërtesat komunale.

Këto janë dy kërkesat eksplicite të Zëvendës-Këshilltarit për Siguri Kombëtare në Shtetet e Bashkuara të Amerikës, Jon Finer, të drejtuar kryeministrit të Kosovës, Albin Kurtit, të premten.

Në një bisedë telefonike të realizuar me të parin e qeverisë në Kosovë, Finer, ka nënvizuar shqetësimin e SHBA-ve për situatën e tensionuar në Veri të Kosovës duke u bërë thirrje të dyja palëve të ndërmarrin hapa që shtensionojnë situatën në këtë pjesë të vendit.

“Ai kërkoi nga Qeveria e Kosovës që t’u mundësojë kryetarëve të sapozgjedhur të komunave të kryejnë detyrat e tyre nga lokacionet alternative dhe të tërheqë forcat policore nga ndërtesat komunale. Ai gjithashtu përshëndeti gatishmërinë e kryeministrit Kurti për të punuar për zgjedhje të reja”, thuhet në komunikatën për media e lëshuar nga Shtëpia e Bardhë.

Finer gjithashtu ka kërkuar nga Kosova dhe Serbia të riangazhohen në dialogun e lehtësuar nga BE-ja duke zbatuar në plotni Marrëveshjen e Brukselit/Ohrit.

Në po të njëjtën ditë, pra të premten, zëvendësi i Jake Sullivan, Finer, ka realizuar një bisedë telefonike edhe me presidentin e Serbisë, Aleksandër Vuçiç.

Në një komunikatë të lëshuar për media nga Shtëpia e Bardhë bëhet e ditur se Finer ka kërkuar në mënyrë eksplicite që Qeveria e Serbisë ta tërheqë forcat e saj të armatosura nga kufiri me Kosovën dhe të ulë gjendjen e gatishmërisë të ushtrisë serbe.

“Finer kërkoi nga Serbia gjithashtu t’u bëjë thirrje protestuesve që të protestojnë në mënyrë paqësore në Veri të Kosovës”.

Zëvendës-këshilltari për Siguri Kombëtare i Biden me kërkesa eksplicite: Kurti ta tërheqë policinë, Vuçiç ushtrinë, të de-përshkallëzohet situata

Ndryshe Albanian Post më 1 qershor publikoi skenarin tetë-pikësh, i hartuar nga vendet e QUINT-it e Bashkimit Evropian, për de-eskalimin e situatës në Veri të Kosovës.

Në pikën e parë, të dokumentit të publikuar nga AP, kërkohet angazhimi i menjëhershëm për interpretimin e Marrëveshjes Bazë mes Kosovës dhe Serbisë, nënshkruar në Ohër, veçanërisht në pikat 1,3,7 dhe 9.

Artikulli 1 kërkon që palët të zhvillojnë raporte normale. Artikulli 3, që të gjitha mosmarrëveshjet të zgjidhen përmes mjeteve paqësore. Ai 7, që ka të bëjë me krijimin e komunave të vetëmenaxhuara me shumicë serbe në Kosovë si dhe artikulli 9, ku të dy palët dhe donatorë angazhohen për të krijuar paketa financiare për zhvillimin ekonomik.

Pika e dytë, parasheh tërheqjen e Forcave Speciale të Kosovës nga veriu, bashkëngjitur me tërheqjen e Ushtrisë serbe nga kufiri verior i Kosovës.

Në pikën e tretë shkruhet se siguria në territorin e komunave veriore i kalon Policisë së Kosovës, asistuar nga KFOR dhe EULEX.

Pika e katërt parasheh zhbërjen e çdo proteste dhe rikthimin e jetës normale në vend. Punonjësit e komunave duhet të kthehen në pozitat e tyre dhe të ushtrojnë detyrën pranë objekteve sipas parashikimit ligjor.

Në korrik 2023, kryetarët e komunave japin dorëheqje dhe presidentja Vjosa Osmani shpall zgjedhje të reja.

Pika e gjashtë parasheh mbajtjen e këtyre zgjedhjeve në fund gushti ose fillim shtatori 2023.

Kërkohet ndërkaq sipas pikës shtatë se pikat 3,4,5 dhe 6 të marrëveshjes bazë, do të kenë progres domethënës, duke implementuar edhe artikullin 1 të marrëveshjes.

Në mes nëntori, siç përshkruan pika e 8 dhe e fundit, implementohet me efektivitet artikujt 1,2,3,4 dhe 9 të marrëveshjes.

EKSKLUZIVE/ 8 pikat ndërkombëtare për de-përshkallëzimin e situatës në veri

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.