Lajme

Kurti në takim me Peach: Jam gati për takim me Vuçiç-in


Kryeministri i Kosovës, Albin Kurti dhe i dërguari special i Britanisë për Ballkanin Perëndimor, Stuart Peach.

Kryeministri i Kosovës Albin Kurti, ka bërë të ditur se mbrëmë ka takuar të dërguarin special të Britanisë për Ballkanin Perëndimor, Stuart Peach me të cilin ka biseduar për situatën në Veri.

Lajmin e ka kumtuar kryeministri përmes një cicërime në rrjetin social ‘Twitter’.

“Patëm një takim natën vonë me Lordin Stuart Peach për të diskutuar më të fundit mbi veriun. U deklarua se qëllimi i vendosjes së policisë ishte vetëm ruajtja e sundimit të ligjit. Ritheksova gatishmërinë time për bisedime të nivelit të lartë nën lehtësimin e BE-së”.

“Falënderova gjithashtu Qeverinë e Mbretërisë së Bashkuar për mbështetjen e tyre”, ka shkruar Kurti.

Lajmi për takimin e Kurtit me Peach është bërë i ditur edhe nga Zyra e Kryeministrit ku është thënë se Kurti ka falënderuar Mbretërinë e Bashkuar për mbështetjen e vazhdueshme ndaj Republikës së Kosovës.

Dita e katërt që serbët po protestojnë në Veri

Është dita e katërt me radhë që serbët në Zveçan, Leposaviq dhe Zubin Potok po protestojnë, duke kundërshtuar kryetarët e rinj shqiptarë.

Më 26 maj, tensionet në Veri u rritën, atëherë kur krerët e rinj të Zveçanit, Leposaviqit dhe Zubin Potokut, kishin hyrë nën përcjelljen e policisë në ndërtesat komunale.

Ndërkaq, më 29 maj, protestuesit u përleshën me trupat e misionit paqeruajtës të NATO-s në Kosovë, KFOR.

Nga kjo përleshje 41 trupa të KFOR-it u lënduan dhe dhjetëra protestues.

Ambasadorët e Shteteve të Bashkuara të Amerikës e Britanisë së Madhe kanë kërkuar që të ndalet menjëherë dhuna ndaj pjesëtarëve të KFOR-it.

Kryetarët e rinj shqiptarë u zgjodhën në zgjedhjet e parakohshme të 23 prillit.

Këto zgjedhje u mbajtën pas dorëheqjes së kryetarëve të mëparshëm komunale nëntorin e 2022.

Kryetarët e mëparshëm vinin nga Lista Serbe partia kryesore e serbëve në Kosovë, e cila nuk mori pjesë në zgjedhje dhe procesi u bojkotua nga serbët lokalë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore