Kurti i premton komunave rritje të mbështetjes

Kryeministri i Kosovës, Albin Kurti, ka deklaruar se me reformat e përgjithshme janë duke punuar edhe në drejtim të mbështetjes së komunave dhe shtimit të shërbimeve publike si dhe rritjes së cilësisë së tyre.

Ai këtë deklaratë e bëri të premten, ku bashkë me zëvendëskryeministren dhe ministren e Punëve të Jashtme dhe të Diasporës, Donika Gërvalla Schwarz, dhe ministrin e Administrimit të Pushtetit Lokal, Elbert Krasniqi, morën pjesë në shënimin e 21- vjetorit të themelimit të Asociacionit të Komunave të Kosovës.

“Përgjatë këtyre viteve kemi rritur fondin e dedikuar për performancë të komunave si dhe kemi fuqizuar kapacitetet administrative për menaxhimin e saj. Vetëm këtë vit kemi ndarë 7.8 milionë euro bashkëfinancim me donatorë për skemën e këtij granti, ku janë shpërblyer 14 komuna për punën më të mirë dhe janë financuar 25 projekte të tyre”, ka thënë ai.

Sipas njoftimit të zyrës së Kryeministrit edhe buxheti komunal është rritur për komunat.

“Si rritje rekord të të hyrave buxhetore, Granti i Përgjithshëm për vitin 2023 është miratuar nga Komisioni i Granteve me një rritje prej 32%. Pra, kemi ndarë rreth 255.2 milionë euro më shumë buxhet për nivelin komunal”.

Kryeministri konsideron se për përparimin më të shpejtë e me cilësi më të madhe të komunave kanë rëndësi që të gjithë, secila kategori shoqërore, por ai veçoi mërgatën, gratë dhe rininë.

”Këto janë tri kategoritë kryesore shoqërore që i bëjnë reformat e thella aq shumë të domosdoshme në vendin tonë”, tha Kurti.

Ndërkaq, potencoi se si qeveri do të dëgjojnë me vëmendje nevojat, kërkesat, por edhe idetë e tyre.

“Komuna është e përbashkët, andaj siç jemi bashkë në këtë 21- vjetor të Asociacionit të Komunave të Kosovës, le të jemi për çdo ditë në shumë e shumë vite në vijim”, u shpreh ai në përmbyllje të fjalës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.