Kurti dhe nënsekretari italian, flasin për rritje të shkëmbimeve tregtare mes dy shteteve

Kryeministri i Kosovës, Albin Kurti, është takuar me nënsekretarin e Shtetit për Punë të Jashtme të Italisë, Benedetto Della Vedova.

Këtë e ka bërë të ditur zyra e Kryeministrit përmes njoftimit për media.

“Duke potencuar marrëdhëniet e shkëlqyeshme bilaterale ndërmjet Kosovës dhe Italisë, Kryeministri Kurti shprehu mirënjohjen për ndihmën dhe përkrahjen e vazhdueshme të Italisë për vendin tonë”.

Ndër të tjera, gjatë bisedës u përmend edhe rritja e shkëmbimeve tregtare mes Italisë dhe Kosovës.

“Ai theksoi vullnetin e Qeverisë së Republikës së Kosovës për rritje të shkëmbimeve tregtare mes dy shteteve dhe gatishmërinë për tërheqje të investimeve në Kosovë”, thuhet në njoftimin për media.

“Duke vlerësuar Italinë si partner dhe aleat edhe në BE dhe NATO, kryeministri vlerësoi kontributin dhe ndihmën e Italisë për Kosovën, dhënë nëpërmjet Bashkimit Evropian dhe NATO-s”.

Ndërsa, nënsekretari italian i Shtetit, falënderoi kryeministrin Kurti për pritjen.

Duke biseduar për indikatorët pozitiv ekonomik, të dy janë “pajtuar se demokracia është mënyra më e mirë për të arritur rritje ekonomike”.

Vedova përgëzoi kryeministrin për pozicionimin e qartë të Qeverisë së Republikës së Kosovës dhe vendosjen e sanksioneve ndaj Federatës Ruse.

“Në takim u theksua domosdoshmëria e parandalimit të ndikimit rus në rajonin e Ballkanit Perëndimor”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.