Ministria e Shëndetësisë, ka marrë vendim që disa kategori ta kenë orarin e punës të kufizuar për shkak të temperaturave të larta që po mbizotërojnë ditëve të fundit në Kosovë.

Përmes një komunikate të lëshuar nga MSH-ja është thënë se ky vendim do të hyj në fuqi nga 13 korrik dhe do të zgjas deri më 20 korrik.

Vendimi i këtij dikasteri vlen fillimisht për gratë shtatzëna e personat me sëmundje kronike.

“Në rast të pamundësisë së lirimit nga puna sipas paragrafit 1 të këtij vendimi, gratë shtatzëna punojnë nga shtëpitë”, thuhet në komunikatën e lëshuar nga MSH-ja.

“Nga data 13.07.2024 deri më 20.07.2024 qytetarët me sëmundje kronike punojnë me orar të shkurtuar deri në 4 orë në ditë”.

Përmes këtij vendimi do të ndalohet edhe puna në sektorin e ndërtimtarisë në ambiente të hapura gjatë orarit 11:00 deri në 17:00 në të gjithë Kosovën.

“Varësisht prej temperaturave që mbizotërojnë gjatë muajit korrik dhe gusht 2024, ndërmerren masa të tjera”.

MSH-ja ka sqaruar se ky vendim është marrë duke pasur parasysh praktikat më të mira për mbrojtjen e shëndetit dhe sigurisë së punëtorëve gjatë periudhave me temperatura të larta.

Kufizohet orari i punës për disa kategori për shkak të temperaturave të larta