Kryeministri etiopian, thirrje qytetarëve: Merrni armët kundër rebelëve

Kryeministri i Etiopisë, Abiy Ahmed, u ka bërë thirrje qytetarëve të hënën e 1 nëntorit, që të marrin armët për t’i bllokuar luftëtarët rebelë që po përparojnë në Amhara-n fqinje.

Ai e bëri thirrjen në median sociale Facebook, pasi rebelët nga shteti verior Tigray, mendohet se morën kontrollin e më shumë qyteteve në Amhara.

Nga ana tjetër, SHBA-të kanë bërë thirrje për një armëpushim në një konflikt njëvjeçar që ka krijuar një krizë humanitare.

Fronti Çlirimtar i Popullit Tigray (TPLF) thotë se qëllimi i tij është të thyejë një rrethim të rajonit verior.

Në deklaratën e tij të dielën, Abiy tha se përparimi i rebelëve “po e shtynte vendin drejt shkatërrimit”.

Ai u bëri thirrje qytetarëve që të “organizohen dhe të marshojnë në çdo mënyrë ligjore me çdo armë dhe fuqi për të parandaluar, thyer dhe varrosur TPLF-në terroriste”, sipas faqes së lajmeve “Addis Standard”.

Komentet e tij përkonin me rebelët që thuhet se pushtuan qytetet strategjike të Dessie-it dhe Kombolcha-s në shtetin Amhara, pak më shumë se 300 km (186 milje) në veri të kryeqytetit, Addis Ababa.

Në një postim në Twitter të hënën, qeveria etiopiane tha se rebelët “ekzekutuan masivisht më shumë se 100 të rinj banorë”, në zonën e Kombolcha-s. TPLF-ja nuk ka komentuar dhe nuk ka konfirmuar asnjë prej vrasjeve.

Ka qenë e vështirë të verifikohen pretendimet e bëra nga të dyja palët në konflikt, sepse komunikimet kanë qenë të kufizuara.

Sekretari amerikan i Shtetit, Antony Blinken, ka ngritur alarmin për përshkallëzimin e konfliktit.

Në një postim në Twitter, ai tha se luftimet e vazhdueshme vetëm sa zgjatën krizën e tmerrshme humanitare në Etiopinë Veriore.

Sipas Organizatës së Kombeve të Bashkuara (OKB) mijëra njerëz janë vrarë në luftë, miliona janë zhvendosur dhe qindra mijëra po përballen me kushtet e urisë.

Të dyja palët e konfliktit janë akuzuar gjithashtu për kryerjen e mizorive. Akuza, të cilat i kanë mohuar.

Si nisi konflikti?

Lufta shpërtheu më 4 nëntor të vitit të kaluar, pasi kryeministri etiopian Abiy urdhëroi një ofensivë ushtarake kundër forcave rajonale në Tigray.

Ai tha se e bëri këtë si përgjigje ndaj një sulmi në një bazë ushtarake që strehon trupat qeveritare atje.

Përshkallëzimi erdhi pas disa muajsh mosmarrëveshjesh midis qeverisë së Abiy-it dhe udhëheqësve të TPLF-së, e cila ishte partia politike dominuese në Tigray.

Autoritetet më vonë e etiketuan TPLF-në një organizatë terroriste dhe përjashtuan çdo bisedë paqeje me ta.

Ofensiva e përtërirë tokësore e qeverisë federale në javët e fundit, duke përfshirë përdorimin e sulmeve ajrore, nuk ka arritur të ndalojë fitimet territoriale të rebelëve.

Bazat në Tigray 

Etiopia është e ndarë në dhjetë shtete rajonale të përcaktuara mbi baza etnike dhe të përshkruara kryesisht autonome, por me institucione qendrore.

Në vitin 2018, pas protestave antiqeveritare, Abiy Ahmed mori detyrën e kryeministrit dhe prezantoi reformat.

Politikanët e fuqishëm nga Tigray, shteti në veri të Etiopisë, e akuzuan Abiy-n për përpjekjen për të rritur fuqinë federale.

Marrëdhëniet u përkeqësuan dhe, pasi qeveria akuzoi rebelët nga rajoni Tigray për sulmimin e bazave ushtarake, ushtria etiopiane u zhvendos atje në nëntor.

Abiy deklaroi konfliktin në fund të nëntorit, por luftimet vazhduan dhe u rritën përpara zgjedhjeve kombëtare më 21 qershor.

Marrë nga BBC, përshtatur për Albanian Post!

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.