Kryeinspektori i shkarkuar për rastin Dehari: S’ka shkelje nga unë, shkarkimi është politik

“Nuk ka të bëj asgjë me punën time, shkarkimi im është puro politik, sepse pikërisht personin që e kanë porositur të më inspektoj e kanë vënë ushtrues detyre të kryeinspektorit, tani”.

Kryeinspektori i Ministrisë së Drejtësisë, Ylber Topalli, në një prononcim për Albanian Post ka thënë se shkarkimi i tij nga detyra, nuk ndërlidhet asgjë me shkeljet procedurale ne rastin e Astrit Deharit, të përmendura në komunikimin publik të Ministrisë së Drejtësisë, një ditë më parë.

“Ka qenë një kërkesë e ministres, më herët për t’i inspektuar procedurat që kanë të bëjnë me rastin e Astrit Deharit, e që në fakt ka përfunduar në një inspektim për raportin tim që e kam bërë unë në vitin 2016-të, në rastin Dehari”, ka treguar Topalli.

Komisioni i formuar nga ministriae Drejtësisë, për hetimin e këtyre procedurave , Topalli thotë se është jo ligjor.

“Sepse kanë qenë në komision inspektorët e mi, do të duhej faktikisht të jenë inspektorë të një rangu më të lartë, jo inspektorë e mi me inspektu punën time”.

Ky komision, tregon kryeinspektori i shkarkuar, ka nxjerrë disa konstatime, të cilat ai i ka quajtur po ashtu jo ligjore e jo të logjikshme.

Pas përfundimit të raportit, Komisioni Disiplinor e ka suspenduar për 15 ditë, por këshilli i i Pavarur Mbikëqyrës e ka rikthyer lëndën e Topallit në rivendosje.

“Dhe gjëja më e çuditshme është se unë nuk jam njoftuar fare, Komisioni nuk më ka thirrur fare, Komisioni Disiplinor. Edhe pse edhe përbërja e Komisionit Disiplinor që e kanë vendos vetë këta, kjo strukturë e qeverisjes tash. Të them të drejtën këtë rezultat të tyre edhe e kam pritur”, shpjegon Topalli.

“Është një goditje 100% politike”, thotë prerë Ylber Topalli.

“Është goditje politike sepse pikërisht personi për të cilin e kanë porositur ta bëj këtë inspektim në rastin tim, e kanë bërë atë ushtrues detyre të kryeinspektorit. Personalitete servile, politike, që i binden çdo pushteti që vjen”.

Sipas MD-së, Ylber Topalli dyshohet se i ka marrë kamerat e sigurisë nga burgu i Prizrenit para Policisë dhe i ka sjellë në Ministrinë Drejtësisë, duke tejkaluar edhe kompetencat që bart detyra e tij, veprime të cilat kanë kontribuar negativisht drejt hetimit të drejtë të vrasjes së Astrit Deharit, gjë të cilën e kundërshton ish-kryeinspektori, në prononcimin e dhënë për Albanian Post.

“Përderisa edhe ata nuk e kanë konstatuar se kur janë marrë kamerat, sepse i kanë tri data, 5, 6 e 7. As ata nuk e dinë. Gabimi i tyre është se ata nuk e dinë as kur i ka marrë policia. E unë jam i bindur se policia i ka marrë para nesh. Sepse kur ndodhin këto raste policia me urdhër të prokurorit hetues e analizon vendin e ngjarjes, krimit çka ka ndodhë dhe ne në të njëjtën kohë nuk mund të shkojmë aty, sepse ka një përzierje të kompetencave aty pastaj”.

“Por, policia shkon njëherë, pastaj ne, janë procedura këto. Ne shkojmë të shohim procedurat e realizuara aty, se çka është shkelë e çka është bërë aty. Të njëjtën gjë e kemi bërë edhe në rastin e Astrit Deharit”, arsyetohet Topalli.

Akuza e dytë të cilën e ka cekur Ministria e Drejtësisë, në shkarkimin e Topallit ka të bëj me disa raporte të tij, në kohën kur po inspektohej rasti Dehari në Shërbimin Korrektues në Prizren.

“Po ashtu, i njëjti ka hartuar dy raporte kontradiktore lidhur me rastin. Në njërin raport, disa ditë pas vrasjes së Astrit Dehari, kryeinspektori Topalli e ka quajtur rastin e Astritit vetëvrasje. Disa ditë më vonë, të njëjtin raport ai e mohon që është i tij edhe pse e ka vendosur nënshkrimin e tij në këtë raport”, thuhet në njoftimin e MD-së.

“Kjo është një gënjeshtër shumë e madhe”, thotë Topalli, për konstatimin e Komisionit hetues ndaj tij, se ai kishte nënshkruar dy raporte kundërthënëse.

“Që në fakt është një raport. Ekziston vetëm një raport, ai i datës 21 i vitit 2016-të. Është raport i protokolluar”, shpjegon më tutje ai.

“Ndërsa raportet tjera që i kanë gjetur ata, asi raporte ka shumë, sepse inspektimi ka zgjatë disa ditë, 15 ditë ka zgjatë inspektimi, e unë për çdo ditë e kam raportuar të kabineti, Ministri i kohës se kështu ka ndodhë, ngjarja ka qenë kjo, kështu, kështu, na duhet edhe kjo punë me u kry, na duhet edhe këtë fakt me vërtetu”.

“Dhe një nga ato raportet është ai, që këta thirren se kinse janë dy raporte. Është kinse unë kam thënë aty vetëvrasje, e kam konstatuar, e më thonë pse ke konstatuar”, vazhdon më tej Topalli.

“Por, nisur nga ky parim, ministrja Haxhiu, çdo prononcim që e ka pas, e ka pas “vrasje”, “vrasje institucionale”, ajo ka bë shkelje tepër më të mëdha se unë, edhe vazhdon me bë prapë. Po e rëndësishme është që raporti zyrtar i protokolluar i datës 21, që e ka në kabinet, që e ka Ministrja, është raport në të cilin unë i jam drejtuar si “rast vdekje”. Vdekja e Astrit Deharit, edhe në çfarëdo varianti, edhe nëse i kam thënë vetëvrasje ose vrasje, nuk është diçka që e cenon esencën e raportit, sepse ajo nuk ka qenë e konstatuar aty, në raport”.

Ish-kryeinspektori i shkarkuar nga detyra është i bindur në të drejtën e tij dhe thotë se do të vazhdojë me procedura të tjera, për të dëshmuar pafajësinë.

“Tash, është procedura e ankesave. Brenda 30 dite kam të drejtë ankese në Këshill të Pavarur Mbikëqyrës. Besoj që Këshilli do t’a shqyrtoj drejtë dhe do të vendos në mënyrë meritore”, përfundon ai.

Pas shkarkimit të Ylber Topallit nga detyra e kryeinspektorit në Ministri të Drejtësisë, në vend të tij është emëruar si ushtrues detyre, Muhamer Bigliqi.

Aktivistit të Lëvizjes Vetëvendosje, Astrit Dehari, u gjet i vdekur në qelinë e burgut në Prizren më 5 nëntor të vitit 2016.

Dehari ishte anëtar i Lëvizjes Vetëvendosje, i arrestuar bashkë me disa pjesëtarë të tjerë të kësaj lëvizje, nën akuzat se kanë sulmuar Kuvendin e Kosovës.

Dehari vdiq në burg. Zyrtarisht u konstatua se ka bërë vetëvrasje, por Vetëvendosje ishte e bindur se dikush e ka vrarë atë.

Nga atëherë, provat janë dërguar edhe në institute jashtë vendit, por nuk është arritur të konstatohet se ka pasur persona të tjerë të përfshirë në vdekjen e Deharit.

Familja e tij, qysh nga vdekja, po vazhdojnë betejën për zbardhjen e rastit. Ata, njëjtë si Vetëvendosje, janë të bindur se dikush ua vrau djalin.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.