Ministri i Punëve të Jashtme të Greqisë, Nikos Dendias, pos takimit me kryeministrin Albin Kurti e presidenten Vjosa Osmani, ai është takuar edhe me homologen e tij në Kosovë, Donika Gërvalla-Schwarz.
Kryediplomati grek i cili po zhvillon vizitën e tij të gjashtë në Kosovë, përmes një cicërime në rrjetin social “Twitter”, tha se me shefen e diplomacisë kosovare ka folur për zhvillimet në Ballkanin Perëndimor dhe dialogun Kosovë-Serbi.
“Gjatë qëndrimit tim në Prishtinë, jam takuar me shefen e diplomacisë së Kosovës, Donika Gërvalla-Schwarz. Diskutim mbi zhvillimet rajonale, duke përfshirë perspektivën drejt BE-së të Ballkanit Perëndimor dhe zhvillimet në lidhje me dialogun Prishtinë-Beograd”, ka shkruar Dendias.
Temë kryesore e të gjitha takimeve që ministri i jashtëm grek ka zhvilluar të dielën, ka qenë procesi i dialogut të lehtësuar nga Bashkimi Evropian dhe takimi i 18 marsit në Ohër mes kryeministrit Albin Kurti dhe presidentit serb, Aleksandër Vuçiç.
Ndryshe, prej pesë anëtarëve të BE-së që nuk kanë njohur pavarësinë e Kosovës, Greqia ka luajtur rolin më bashkëpunues diplomatik, duke lehtësuar lëvizjen e qytetarëve, rritur nivelin e tregtisë, dhe duke dërguar e pritur delegacione.
Qeveria e Greqisë gjithashtu është treguar e hapur dhe e gatshme për zyrtarët kosovarë, duke pritur delegacione kosovare dhe duke bërë shpesh vizita zyrtare në Kosovë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
