Kreu i Organizata Botërore e Shëndetësisë (OBSH) për Evropën, Hans Kluge, e ka konsideruar përhapjen e vaksinave të coronavirus-it në Evropë si “të ngadaltë dhe të papranueshme”.
Fushatat e vaksinimit në pjesën më të madhe të Evropës janë goditur nga vonesat dhe numri i infeksioneve po rritet.
Franca është vendi i fundit që njoftoi masa të reja bllokimi.
Bashkimi Evropian (BE) është kritikuar për ritmin e programit të saj të vaksinimit – vetëm 16% e popullsisë është vaksinuar, krahasuar me 52% në Mbretërinë e Bashkuar.
“Vaksinat paraqesin mënyrën tonë më të mirë për të dalë nga kjo pandemi. Sidoqoftë, shpërndarja e këtyre vaksinave po bëhet në mënyrë të ngadaltë”, tha Kluge në një deklaratë.
“Ne duhet të shpejtojmë procesin duke përshpejtuar prodhimin dhe duke zvogëluar pengesat për administrimin e vaksinave”, shtoi ai.
Javën e kaluar u pa shkalla në rritje e infektimeve me Covid-19 në shumicën e vendeve të rajonit.
Kreu i OBSH në Evropë, paralajmëroi dhe tha të kihet kujdes për rreziqet e përhapjes që lidhen me rritjen e lëvizshmërisë dhe numrin e tubimeve gjatë festave të ardhshme fetare të Pashkëve dhe Ramazanit.
Rreth 27 vende nga më shumë se 50, të përfshira në rajonin e OBSH-së në Evropë, kanë zbatuar bllokime të pjesshme ose të plota për të parandaluar coronavirus-in.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
