“Ngritja e Komisionit të Posaçëm të Reformës Zgjedhore është në shina. Jemi dakordësuar për përbërjen, anëtarët dhe elementet ku ne do të vazhdojmë në bazë të rekomandimeve të OSBE/ODHIR”.
Kështu është shprehur kreu i Grupit Parlamentar të Partisë Socialiste, Taulant Balla, gjatë një takimi me gazetarët paraditen e 27 dhjetorit, për sa i përket ngritjes së Komisionit për Reformën Zgjedhore.
Balla deklaroi se, gjatë punimeve të sesionit të ardhshëm, do të ketë një punë intensive nga ana e përfaqësuesve në çuarjen përpara të Reformës Zgjedhore.
Sipas tij, kjo do të bëhet përpara zgjedhjeve vendore të vitit 2023.
Gjithashtu ai u ndal edhe te puna për sa i përket “Buxhetit 2022” dhe Bashkëqeverisje – të dyja të kthyera në Kuvend nga Presidenti i Republikës.
“Është buxheti më i madh në historinë e 30 viteve të fundit. Nuk prisnim që opozita të votonte buxhetin apo paketën fiskale, janë ndarje tradicionale historike mes shumicës e pakicës. Gjatë këtij sesioni, një ligj që do ta nënvizoja për nga rëndësia është Bashkëqeverisja, e cila do të rrisë transparencën”.
Ndër të tjera, Balla u ndal dhe te një nismë, e cila ka të bëjë me krijimin e regjistrit të personave që kanë kryer vepra kriminale me bazë gjinore – e iniciuar nga Lëvizja Socialiste për Integrim.
“Ajo që doja t’ju vija në dukje, janë 31 ligje të miratuara, 13 me konsensus nga dy palët në Kuvend”, shtoi më tej kreu i Grupit Parlamentar të PS-së.
Ndërsa nuk la pa harruar edhe zgjatjen e organeve të vetting-ut, e cila ka ardhur si kërkesë e Operacionit Ndërkombëtar të Monitorimit.
“Nevoja për të çuar përpara reformën më të rëndësishme të këtyre 30 viteve, duke qenë se të gjithë përshëndesim aksionet e përditshme të SPAK-ut, duhet të jetë dhe busulla orientuese për secilin nga ne që, kur të ulemi në sesionin e ardhshëm, ta ndiejmë si detyrë ndaj shqiptarëve për të çuar përpara procesin e vetting-ut”.
Sipas Ballës, kjo e fundit “na ka mundësuar të kemi prokurorë dhe gjyqtarë të pavarur”.
Në përmbyllje të fjalës së tij, Balla ravijëzoi se, “harmonizimi i qëndrimeve ka një vlerë të rëndësishme dhe që duhet të ndiqet nga të gjithë ne, në mënyrë rigoroze. Edhe me grupin e Partisë Demokratike, të paktën për çështje që lidhen me interesin kombëtar, si ai me Kosovën, nuk duhet të kemi ndasi”, ishte mesazhi i tij.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
‘Dorëzohet’ gjyshja, dorëzon pas një jave 3-vjeçarin në Durrës
-
Zbardhen emrat, mes të proceduarve për protestën para Bashkisë Tiranë edhe dy politikanë
-
Moody’s me vlerësim ‘pozitiv’ për Shqipërinë, ulet borxhi dhe rritet ekonomia
-
Plagosja e gazetarit iranian në Londër, një prej autorëve mund të jetë shqiptar