Kombëtarja e Kosovës barazon me Holandën në miqësoren e parë në futsall

Kombëtarja e Kosovës në futsall ka barazuar pa gola me Kombëtaren e Holandës, në ndeshjen e parë miqësore të zhvilluar të hënën në Zeist.

Dardanët të prirë nga përzgjedhësi i ri, Arben Simitçiu shfaqën një lojë shumë të mirë përballë “Tulipanëve”, të cilët vlerësoheshin favoritë në këtë takim.

Gjatë tërë ndeshjes Dardanët luajtën maksimalisht të përqendruar, duke mos lejuar shumë hapësira për kundërshtarin.

Loja në përgjithësi ishte e hapur nga të dyja ekipet, të cilat e dëshironin fitoren, por me gjithë rastet e krijuara asnjëra nuk arritën ta gjejnë rrugën e golit.

Madje, në minutat e fundit Kosova pati dy mundësi të arta për të shënuar, por Ramadan Alaj dhe Durim Qorri nuk u treguan të saktë nga penalltitë.

Pas ndeshjes, trajneri Simitçiu falënderoi lojtarët për paraqitjen në këtë ndeshje.

“Fillimisht falënderoj djemtë pasi kanë dhënë më shumë se sa maksimumin e tyre në këtë takim. Jam shumë i lumtur me paraqitjen e tyre, sepse me lojën e treguar sonte ata i kanë përmbushur 100 për qind të gjitha detyrat e parashtruara dhe për këtë arsye i falënderoj”, theksoi fillimisht ai.

Simitçiu u shpreh i lumtur me lojën e treguar nga Dardanët, gjithashtu edhe për mënyrën e presioni të lojës të bërë ndaj holandezëve.

“Jam i lumtur si me lojën, ashtu edhe me rezultatin. Patëm dy mundësi për të shënuar dhe për ta fituar ndeshjen, por nuk i shfrytëzuam dy 10 metërsha. Mirëpo, edhe holandezët kishin mundësitë e veta, prandaj mendoj se barazimi është epilog real. E futëm kundërshtarin në presion, për shkak të numrit më të madh të faulleve nga ana e tyre, prandaj edhe mundësitë për fitore i kishim më të mëdha, por sigurisht se nesër në ndeshjen e tjetër do të bëjmë çmos për të fituar”, ka thënë përzgjedhësi i Kosovës Arben Simitçiu.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.