Autoritetet kineze po refuzojnë të lejojnë Sekretarin amerikan të Shtetit Antony Blinken të vizitojë Pekinin.

Kjo, për shkak të shqetësimeve se FBI-ja do të publikojë rezultatet e një hetimi mbi balonën e dyshuar të rrëzuar të spiunazhit kinez.

Lajmi u bë i ditur nga botimi britanik “Financial Times”.

Katër persona të njohur me negociatat thanë se autoritetet kineze i kishin thënë homologëve amerikanë se nuk ishte e përgatitur të riplanifikonte një udhëtim që Blinken anuloi në shkurt, ndërsa mbetet e paqartë se çfarë do të bëjë administrata e presidentit Joe Biden me raportin.

FBI-ja ka analizuar mbetjet e shpëtuara nga balona që kur u rrëzua në shkurt.

Autoritetet amerikane thonë se objekti po spiunonte vende të ndjeshme ushtarake, por Kina thotë se ishte një balonë moti që u hodh jashtë kursit.

Zyrtarët kinezë janë të shqetësuar se administrata e Biden mund të publikojë raportin e FBI-së së bashku me provat fizike nga balona dhe se gjetjet e tij mund të bëhen publike gjatë udhëtimit të Blinken në Kinë.

Ministri i Jashtëm i Kinës, Qin Gang e ngriti çështjen me amerikanët që morën pjesë në Forumin e Zhvillimit të Kinës në Pekin muajin e kaluar, thanë tre persona të njohur me takimin.

Qin e përshkroi hetimin e FBI-së si një shembull tjetër të çështjeve që e kanë bërë të vështirë stabilizimin e lidhjeve SHBA-Kinë, tha një nga njerëzit.

Zyrtarët amerikanë theksojnë se kriza u ndez nga Kina që fluturoi me balonë në hapësirën ajrore të vendit.

FBI-ja dhe Këshilli i Sigurisë Kombëtare nuk pranuan të thonë nëse hetimi do të bëhej publik.

Çështja ka ndezur gjithashtu përçarje brenda administratës Biden, me disa zyrtarë që duan të deklasifikojnë provat për publikim për të treguar se balona po kryente vëzhgim.

Kongresi gjithashtu ka të ngjarë të bëjë presion për publikimin e konkluzioneve të FBI-së.

Por të tjerë thonë se publikimi i informacionit do të prishte përpjekjet për të rifilluar angazhimin e nivelit të lartë të nevojshëm mes vendeve në një kohë kur marrëdhëniet SHBA-Kinë janë në nivelin e tyre më të ulët që kur të dy vendet vendosën marrëdhënie diplomatike në vitin 1979.

Blinken duhej të takohej me Presidentin Xi Jinping në Kinë në shkurt, por papritur e anuloi udhëtimin e tij për shkak të balonës.

Kina ndalon vizitën e Blinken-it në Pekin për shkak të shqetësimeve për ‘balonën spiune’