Është nënshkruar marrëveshja për heqjen e vizave nga Izraeli për shtetasit e Kosovës.

Kjo marrëveshje është nënshkruar mes ministres së Punëve të Jashtme dhe Diasporës, Donika Gërvalla dhe ministrit të Brendshëm të Izraelit, Moshe Arbel.

Gërvalla dhe Arbel, s’kanë dhënë ndonjë deklaratë për media, ato janë lejuar që të marrin vetëm pamje nga nënshkrimi i marrëveshjes.

Më 29 janar, Osmani kishte njoftuar se Izraeli është pajtuar t’i heqë vizat për shtetasit e Kosovës, që do t’ua mundësojnë atyre udhëtimin lirshëm drejt vendit të Lindjes së Mesme me qëllime turistike.

Ky vendim i Izraelit i cili është vendi i fundit që e njohu pavarësinë e Kosovës para rreth tri vjetëve, thuhej se do të hynte në fuqi pas nënshkrimit të marrëveshjes.

“Në këtë drejtim, të dy ministritë përkatëse do të vazhdojnë me procedurat e nënshkrimit të marrëveshjes dhe qytetarët do të njoftohen sapo vendimi të hyjë në fuqi. Përmes kësaj marrëveshje, qytetarëve të Kosovës do t’u mundësohet udhëtimi pa viza në Izrael për qëllime turistike”, thuhej në komunikatën e presidencës.

Prej 1 janarit, shtetasit e Kosovës me pasaporta biometrike janë në gjendje të udhëtojnë lirshëm në shtetet e zonës Schengen, pas hyrjes në fuqi të vendimit për liberalizimin e vizave.

Që nga 5 janari, kosovarëve iu mundësua ta vizitojnë edhe Spanjën pa viza.

Liberalizimi i vizave u mundëson qytetarëve të Kosovës, që kanë pasaporta biometrike, të qëndrojnë deri në 90 ditë – brenda gjashtë muajsh – në cilindo nga 27 shtetet anëtare të zonës Schengen.

Udhëtimet pa viza shërbejnë për vizita turistike, çështje familjare ose të ngjashme.

Megjithatë, liberalizimi i vizave nuk nënkupton leje pune apo përfitime të tjera.

Izraeli heq vizat për Kosovën, nënshkruhet marrëveshja