Ishulli i Zvërnecit

Ishulli i Zvërnecit ndodhet në Vlorë. Ai ofron një pamje unike dhe pikëtakim të veçantë për të gjithë ata që duan të takojnë natyrën.

Ishulli e ka marrë emrin nga fshati me të njëjtin emër dhe gjendet rreth 13 km larg qytetit të Vlorës. Ishulli dhe fshati shtrihen në pjesën veriore të distriktit të Vlorës dhe është pjesë e guidave lokale turistike Vlorë-Fshati Zvërnec-Ishull Zvërnec.

Vendndodhja

Për të shkuar në Zvërnec, duhet të kalosh përmes fshatit të Nartës dhe Pyllit të Vjetër të Sodës. Rruga, e cila është e asfaltuar, përfundon në kufijtë e saj me pamjen e ishullit të Zvërnecit.

Ishulli njihet për pyllin fantastik prej disa hektarësh me pemë të larta që e mbrojnë si kurorë dhe për Manastirin e Shën Mërisë, një vepër e periudhës bizantine. Lartësia e ishullit është rreth 30 metra mbi nivelin e detit.

Manastiri i Zvërnecit

Manastiri është një nga veprat më mbresëlënëse të trashëgimisë kulturore dhe fetare. Ndërtimi i tij mendohet të ketë ndodhur mes shek XII-XIII dhe karakterizohet nga stili bizantin në arkitekturë. Për të shkuar në manastir ndiqet një urë druri, tipike për distanca të shkurtra, e cila lëkundet mbi ujërat e detit që ndan tokën nga ishulli.

Manastiri mban emrin e Shën Mërisë; çdo 15 gusht banorët përreth e kremtojnë këtë datë të kalendarit liturgjik si ditën e gruas që lindi Krishtin. Në varrezat e manastirit ndodhet dhe varri i gruas që qëndisi flamurin, me të cilin u shpall Pavarësia e Shqipërisë në vitin 1912.

Pylli

Pylli i Zvërnecit është monument natyre me një sipërfaqe prej disa hektarësh. I gjithë kompleksi me pemë të larta është mbresëlënës në fushën e studimeve shkencore, pasi konsiderohet si habitat i pasur për lakuriqin e natës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.