Irani sinjalizon vendosmërinë për të zbatuar rregullat e hixhab-it

Autoritetet iraniane e kanë bërë të qartë vendosmërinë e tyre për të zbatuar hixhab-in e detyrueshëm për gratë.

Ky angazhim vjen pas muajsh protestash që kërkonin fundin e kufizimit.

Lajmi u bë i ditur nga multimediali britanik “BBC”.

Një deputet iranian i linjës së ashpër i ka lëshuar një ultimatum gjyqësorit për të marrë masa.

Kjo, për t’i dhënë fund grave që shkelin rregullat për shamitë, brenda 48 orëve të ardhshme.

Protestat masive që shpërthyen në të gjithë Iranin në shtator janë shtypur kryesisht nga forca brutale.

Por disa gra vazhdojnë të sfidojnë rregullat për mbajtjen e një shamie të detyrueshme në publik.

Videot dhe fotot e postuara në internet tregojnë se rritja e zhgënjimit dhe zemërimit me kufizimet është ende një forcë e fuqishme në shoqërinë iraniane.

Një video e postuar këtë javë tregon një burrë duke i hedhur një legen me kos në fytyrë një gruaje të pambuluar.

Veprimi i tij u prit me zemërim nga kalimtarët meshkuj dhe femra.

Protestat përfshinë Republikën Islamike pas vdekjes në shtator të Mahsa Amini, një gruaje 22-vjeçare e arrestuar nga policia e moralit në Teheran për dyshimin se mbante hixhabin e saj “në mënyrë të pahijshme”.

Me mijëra janë arrestuar dhe katër protestues janë ekzekutuar që nga dhjetori.

Por autoritetet nuk tregojnë asnjë shenjë dorëzimi.

Ministria e Brendshme njoftoi këtë javë se nuk do të ketë tërheqje apo tolerancë për këtë çështje.

Në deklaratë thuhet se hixhabi mbetet një element thelbësor i ligjit islamik dhe si i tillë do të mbetet një nga parimet kryesore të Republikës Islamike të Iranit.

Retorika e palëkundur i bëri jehonë asaj të kreut të gjyqësorit, Gholamhossein Mohseni-Ejei, i cili kohët e fundit tha se gratë që nuk mbajnë mbulesën e kokës do të ndiqen penalisht pa mëshirë.

Tani, një deputet i linjës së ashpër ka thënë se duhet të merren masa legjislative për të zbatuar atë që ai e quajti “dekretin hyjnor” të hixhabit.

Hossein Ali Haxhi Deligani tha se nëse gjyqësori nuk do të parashikonte një veprim të tillë brenda 48 orëve të ardhshme, atëherë deputetët do të kalonin një projektligj për plotësimin e vakumit ligjor.

Ai tha se do të ishte në përputhje me një raport të komisionit parlamentar të kulturës për “dlirësinë dhe hixhabin”.

Protestat u zgjeruan për të përfshirë thirrjet për një rregullim të plotë të Republikës Islamike – por ajo mbeti e rrënjosur në çështjen e hixhabit.

Imazhi i Mahsa Amini ka mbetur simboli më i fuqishëm i lëvizjes, e cila për njëfarë kohe mundi të shkundte themelet e teokracisë që ka sunduar Iranin për më shumë se 40 vjet.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.