Investimet e huaja në tregun shqiptar të pasurive të paluajtshme ranë në tremujorin e parë 2023

Banka Qendrore e Shqipërisë raportoi se sasia e investimeve të huaja në tregun e pasurive të paluajtshme të vendit, u ul në tremujorin e parë të 2023.

Shifra ra për herë të parë në dy vitet e fundit.

Statistikat e bilancit të pagesave tregojnë se investimet e huaja direkte (IHD) në pasuri të paluajtshme arritën në 49 milionë euro.

Kjo është 25% më pak se në të njëjtën periudhë të një viti më parë.

Rezultati ishte gjithashtu më i ulëti që nga fillimi i vitit 2021, pas të cilit përmasat e investimeve të huaja në tregun shqiptar të pasurive të paluajtshme janë rritur në mënyrë të vazhdueshme, duke e bërë sektorin përkatës një nga nxitësit e IHD-ve.

Siç vërejnë sekserët vendas, të huajt blinin kryesisht vila dhe apartamente në zonat bregdetare.

Në përgjithësi, flukset e IHD-ve në tremujorin e parë të vitit 2023 arritën në 308 milionë euro.

Investimet në pasuri të paluajtshme përbënin pothuajse 16% të totalit. Sektori renditet i treti për sa i përket peshës ndaj totalit të investimeve të huaja pas aktiviteteve minerare dhe financiare.

Në të njëjtën periudhë të vitit 2022, sektori i pasurive të paluajtshme përbënte pothuajse 22% të totalit të IHD-ve.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.