Inflacioni arrin 9.1% në SHBA në qershor, shtohet presioni ndaj Bankës Qendrore

Në Shtetet e Bashkuara të Amerikës, çmimet e konsumit janë rritur më shumë se parashikimi i muajit qershor.

Ato kanë arritur një ritëm vjetor prej 9.1 për qind, një nivel i ri 40-vjeçar që çimenton pritshmëritë për një rritje tjetër historikisht të madhe prej 0.75 pikë përqindjeje të normës së interesit të Rezervës Federale këtë muaj.

I publikuar nga Byroja e Statistikave të Punës, indeksi i çmimeve të konsumit është përshpejtuar më tej muajin e kaluar, mbi vlerësimet e ekonomistëve për një rritje prej 8.8 për qind.

Çka ka shënuar rritjen më të shpejtë nga viti në vit që nga nëntori 1981.

Çmimet u rritën me 1.3 për qind të tjera në muaj në muajin qershor, pas një rritjeje prej 1 për qind në maj.

Të dhënat pritet të nxisin përpjekjet e Bankës Qendrore për të rivendosur stabilitetin e çmimeve, i cili u intensifikua në mënyrë dramatike muajin e kaluar pasi zyrtarët braktisën planet e parashtruara më parë për të ofruar një rritje të normës gjysmë pikë.

Në vend të saj, ata zbatuan rritjen e parë prej 0.75 pikë përqindjeje që nga viti 1994.

Po ashtu politikëbërësit kanë sinjalizuar synimin e tyre për të rritur normat në një nivel që fillon të frenojë aktivitetin ekonomik deri në fund të vitit.

Ata po kërkojnë të mbajnë një qasje agresive për shtrëngimin e politikës monetare derisa të ketë prova se leximet mujore të inflacionit ngadalësohen drejt një ritmi më të qëndrueshëm me objektivin prej 2 për qind.

Administrata e presidentit Joe Biden, popullariteti i së cilës ka rënë në sfondin e rritjes së inflacionit, këtë javë u përpoq të kalonte shifrën e lartë të qershorit dhe zvogëloi përshpejtimin, duke theksuar se të dhënat mbulonin një periudhë përpara një rënie të mprehtë të çmimeve për energjinë dhe mallrat e tjera.

Nëse banka rrit normat me tre të katërtat e një pikë përqindjeje në takimin e korrikut, diapazoni i synuar i normës së fondeve federale do të rritet në 2.25 deri në 2.50 për qind.

Krahas këtyre veprimeve, banka ka përfshirë në retorikën e saj jo vetëm angazhimin “e pakushtëzuar” për uljen e inflacionit, por edhe që është e gatshme të rrezikojë në drejtim të rimëkëmbjes ekonomike për ta bërë këtë.

Teksa kërkesa për fuqi punëtore ka mbetur e fortë, me 372 mijë vende pune të tjera të krijuara vetëm muajin e kaluar, ekonomistët kanë frikë se momenti do të lehtësohet së shpejti.

Tanimë, Banka Qendrore ka nisur të pranojë se papunësia do të duhet të rritet, me zyrtarët që së fundmi parashikojnë se papunësia do të rritet nga niveli aktual historikisht i ulët prej 3.6 për qind në pak mbi 4 për qind deri në fund të vitit 2024.

Shumë ekonomistë besojnë se një vlerësim më i saktë është në afërsi të 5 përqindëshit, që përkthehet në humbje të konsiderueshme të vendeve të punës.

Marrë nga “Financial Times”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.