India njihet ndryshe si një nga vendet më të shenjta në botë.
Por, gjithashtu, ky shtet dita-ditës po shndërrohet në “parajsën e vegjetarianëve”, pasi për shkak të disa traditave fetare ndalohet shërbimi dhe konsumimi i mishit.
Një ndër qytetet interesante, i cili tërheq mjaft turistë, është Varanasi, i cili ndryshe njihet si “kryeqyteti shpirtëror i Indisë”.
I njohur si qyteti i Zotit Shiva, perëndia e krijimit dhe shkatërrimit, besohet se kushdo që vdes këtu, do të çlirohet nga cikli i rimishërimit.
Gjëja më interesante në këtë qytet mistik është se ritualet praktikohen në lumenj, ku mendohet se aty njerëzit mund të lajnë mëkatet.
I banuar që nga viti 1800 para Krishtit, Varanasi pretendohet të jetë një ndër qytetet më të vjetër në botë.
Çdo ditë, ndërsa zhurma e kambanave të tempullit jehon, dhjetëra mijëra besimtarë zbresin shkallët e qytetit dhe zhyten në lumin Gange për të larë mëkatet e tyre.
Megjithatë, Amrita Sarkar, e cila është pasionante e udhëtimeve dhe eksplorimit të gjërave të reja, tregon se shkoi atje për të zbuluar ushqimin unik vegjetarian të qytetit.
Varanasi mund të jetë kryeqyteti shpirtëror i Indisë, por nuk është saktësisht i njohur për joshjen e pelegrinëve të kuzhinës.
Shumica e turistëve, kur vizitojnë Indinë, shkojnë në Dehli, Kolkata ose Chennai përpara se të ndalen në Varanasi.
Megjithatë, kuzhinierët nga e gjithë bota kanë filluar të frymëzohen nga trashëgimia e kuzhinës, duke rikrijuar shijet e saj në restorantet e tyre.
Sigurisht, në një vend që është 80% hindu, restorantet vegjetarianë janë të kudogjendur në Indi.
Por ajo që e bën kuzhinën vegjetariane të Varanas-it kaq interesante, është sesi specialitetet e saj – si “menuja sattvic” një lloj ushqimi special indian – ndikohet nga ndjenja e fortë e spiritualitetit.
Një menu ‘sattvic’ bazohet te parimet e riteve fetare dhe u përmbahet standardeve më të rrepta të vegjetarianizmit të përshkruara nga Dharma Sanatana, formë absolute e hinduizmit.
Si i tillë, ndalon përdorimin e qepës dhe hudhrës në gatim, të cilat besohet se rrisin zemërimin, agresionin dhe ankthin.
“Pothuajse çdo familje hindu në Varanasi mban një objekt që i kushtohet Shivait në shtëpi. Të hash mish në shtëpi është e paimagjinueshme”, shpjegoi Abhishek Shukla, një shastri (prift) nga tempulli i famshëm Kashi Vishwanath të Varanasit.
“Mishi, qepa dhe hudhra përkeqësojnë gjendjen tonë”, përmbylli ai.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.comLajmet kryesore
-
Meta-Kryemadhi përballen kokë më kokë, për ‘familjen’ dhe partinë
-
Euronews Green: Shqipëria prodhon 100 % energji nga burime të rinovueshme
-
Sulm i dyshuar izraelit ndaj Iranit, SHBA mohon përfshirjen
-
Maqedonci: Situata është e qetë – jemi të përgatitur dhe të trajnuar për ta mbrojtur territorin tonë