Një tjetër lojtar nga Premier League kërkohet në Itali.
Bëhet fjalë për Callum Hudson-Odoi, talentin e Chelsea-s i cili kërkohet me ngulm nga Lazio e Maurizo Sarri-t.
Sarri, ish-trajner i Hudson-Odoi te Chelsea, ka mbetur i mahnitur nga talenti i tij, dhe e dëshiron ribashkimin me të.
Pikërisht Sarri ishte ai që i dhuroi anglezit debutimin e tij me skuadrën e parë të bluve gjatë sezonit 2018/19.
Odoi, që luan pozitën e mesfushorit të avansuar dhe shpesh herë gjindet në krahët e sulmit, është pikërisht një profil që Sarri e dëshiron.
Hudson-Odoi nuk është emri më i preferuar i trajnerit Tuchel, dhe prandaj një lëvizje diku tjetër mund t’i interesonte atij.
Mirëpo, me rastet e shumta të COVID në skuadrën blu, Odoi po gjen minuta dhe ka filluar ngadalë që ta shfaqë potencialin e tij të vërtetë.
Lazio-s, një transferim i mundshëm do i bëhej më i lehtë nëse largohet sulmuesi i kombëtares së Kosovës, Vedat Muriqi.
Odoi kushton 30 milionë euro, por Lazio momentalisht është e gatshme ta sjellë në mënyrë huazimi me të drejtë blerje.
Siç qëndron situata, ky transferim duket i vështirë, por asnjëherë i pamundur.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com