Hovenier: ShBA-ja ka besim të plotë në Borrellin dhe Lajçakun

Ambasadori i Shteteve të Bashkuara të Amerikës, Jeffrey Hovenier, gjatë një fjalimi të mbajtur në edicionin e dytë të Samitit të Paqes dhe Demokracisë që po mbahet në Prishtinë, tha se vendi i tij ka besim të plotë në Bashkimin Evropian si ndërmjetësuese e dialogut mes Kosovës dhe Serbisë.

“SHBA-ja ka besim të plotë në BE-në në ndërmjetësimin e saj të dialogut, SHBA-ja ka besim të plotë në përfaqësuesin e lartë të BE-së, Josep Borrell dhe përfaqësuesin e posaçëm [për dialogun Kosovë-Serbi, Mirosllav Lajçak, si zbatues objektivë të kësaj politike”, tha Hovenier.

Ndryshe nga Hovenier, kryeministri i Kosovës, Albin Kurti dy ditë më parë e ka akuzuar Lajçak-un se është i anshëm në dialog, ia mban anën Serbisë dhe mban gjera të fshehura nga shtetet anëtare të BE-së.

Në një konferencë të gjatë për media, Kurti bashkë me zëvendësin e tij, Besnik Bislimi, e kanë bërë direkt pengues të procesit te dialogut vetë Lajçakun, personin që është i angazhuar për ta avancuar.

Kurti s’ka lënë dyshime duke deklaruar se Lajçak është person që punon për Serbi.

Madje, ka deklaruar se ka mundësi që as Josep Borrell, shefi i tij, nuk është në dijeni të këtij raporti të ndytë mes Lajçakut e palës serbe.

Kurti deklaroi se tashmë ka dërguar letra edhe te shtetet anëtare të BE-së, si Franca, Gjermania e Italia, për të dhënë vërejtjet e tij për Lajçakun.

Ndërsa Bashkimi Evropian i ka quajtur si “akuza të pabaza” deklaratat e kryeministrit të Kosovës, Albin Kurtit, se përfaqësuesi Special i Bashkimit Evropian, Miroslav Lajçak, është i anshëm në dialog.

“Nuk i komentojmë deklaratat veçanërisht ato që janë akuza të baza”, tha zëdhënësi i BE-së kur u pyet për deklaratën e Kurtit ku akuzoi Lajçak-un se po favorizon Beogradin në procesin e bisedimeve.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.