Haradinaj ka udhëtuar për në Uashington: Do kem takime në Departamentin e Shtetit, Senat dhe Kongres

Kryetari i Aleancës për Ardhmërinë e Kosovës, Ramush Haradinaj, ka njoftuar përmes llogarisë së tij në Facebook se tashmë gjendet në Uashington të Shteteve të Bashkuara të Amerikës me një ftesë për të marrë pjesë në ceremoninë e “Lutjeve të Mëngjesit”.

“Gjatë kësaj vizite do të kem një agjendë e cila do të përfshijë takime në Departamentin e Shtetit, Senat dhe Kongres, e po ashtu edhe takime tjera me institucione të rëndësishme”, ka shkruar Haradinaj në llogarinë e tij në Facebook.

Ai ka postuar në përshkimin e tij edhe një foto, ku thotë të jetë me “miqtë e vjetër të Kosovës, znj. Nancy Y. Bekavac, anëtare e Bordit të Universitetit Amerikan (AUK) dhe Shaun Burn, të cilët kanë qenë dhe vazhdojnë të jenë zëri ynë në Amerikë”.

Në fund të tekstit, Haradinaj shkruan se “Kosova asnjëherë nuk duhet të harrojë që aleanca me ShBA-të është e përjetshme”.

Ajo, thotë Haradinaj, duhet të “mirëmbahet me punë, komunikim të sinqertë dhe bashkëpunim të vërtetë”.

Vizita e Haradinajt në SHBA vjen në një kohë kur Ambasada Amerikane në Prishtinë ka ftuar akterë politikë, institucionalë e nga shoqëria civile për të diskutuar rreth themelimit të Asociacionit të Komunave me Shumicë Serbe.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.