Janë hapur në orën 07:00, ashtu siç ishte planifikuar, qendrat e improvizuara të votimit në kontejnerëve në katër komunat veriore të Kosovës.

Për këto zgjedhje të jashtëzakonshme në Mitrovicë të Veriut, Zveçan, Leposaviq dhe Zubin Potok, janë certifikuar 11 kandidatë për kryetar komune, ndërsa në zgjedhjet për dy kuvendet komunale më shumë se 60 sosh.

Subjektet në garë janë: Iniciativa qytetare Mitrovica, Partia Demokratike e Kosovës, Partia e Serbëve të Kosovës, Lëvizja Vetëvendosje, si dhe një kandidate e pavarur.

Për shkak të sigurisë, siç ishte njoftuar edhe më parë, numri më i madh i vendvotimeve do të jetë në kontejnerë dhe jo në shkolla, siç ka ndodhur më parë në zgjedhje.

Derisa në zgjedhjet e kaluara në këto katër komuna veriore ka pasur mbi 40 qendra votimi, për shkak të sigurisë, por edhe pritjes për pjesëmarrje të ulët, numri është ulur në vetëm 19 dhe 13 prej tyre janë kontejnerë.

Siç dihet, partia më e madhe mes serbëve të Kosovës, Lista Serbe, i ka bojkotuar këto zgjedhje dhe nuk është certifikuar.

Lista Serbe ka ftuar gjithashtu qytetarët që të bojkotojnë zgjedhjet, por i ka ftuar që të mos “bien preh e provokimeve” dhe “të qëndrojnë të qetë”.

Sipas informatave të para, shumica e qendrave të votimit janë hapur me kohë. Disa që janë vonuar, ka ndodhur për shkak të vështirësive të shpërndarjes së materialit votues”.

Para çdo qendre të votimit ka pjesëtarë të policisë së Kosovës, kurse më në distancë edhe trupa të KFOR-it.

Si kishte ardhur deri tek këto zgjedhje?

Zgjedhjet për katër kryetarë komunash veriore të Kosovës dhe dy asamble komunale do të duhej të mbaheshin në dhjetor të vitit të kaluar, por ato u shtynë për 23 prill të këtij vit, pas kërkesës së ndërkombëtarëve që të mos vazhdohet tutje me procedura të rregullta, meqë situata në terren nuk e mundësonte.

Nevoja për zgjedhje lindi pasi në mënyrë të organizuar Lista Serbe, partia më e madhe e serbëve në Kosovë, tërhoqi kryetarët e komunave, deputetët, ministrat dhe gjithë stafin administrativ nga institucionet e Kosovës.

Largimi nga institucionet u bë si shenjë proteste për disa shkarkime që ndodhën në radhët e policisë, përfshirë komandantin serb të stacionit në veri, meqë ata nuk i përfillen urdhrat e dhëna me vendim qeveritar, për gjobitjen e të gjitha veturave me targa ilegale “KM”.

Më pas, kur qeveria u pajtua ta shtyjë zbatimin e vendimit, Lista Serbe u deklaruar se si kusht për t’u kthyer në institucionet kanë fillimin e themelimit të Asociacionit të Komunave me Shumicë Serbe.

Kosova është pajtuar që ta themelojë Asociacionin me Marrëveshjen për Rrugën Drejt Normalizimit të Raporteve me Serbinë, por Lista Serbe prapë refuzoi të regjistrohet në Komisionin Qendror Zgjedhor për t’u futur në listë të partive që garojnë.

Hapen kontejnerët e votimit në Veri – s’ka fluks në minutat e parë