Gruaja e Schröder-it thotë se ai shkoi në Rusi për “energjinë”

Gruaja e ish-kancelarit gjerman Schröder, So Yeon Kim, konfirmoi të martën se ai shkoi në Moskë për një vizitë dhe qëllimi i tij është të negociojë me Rusinë për çështjet e energjisë.

Lajmi u bë i ditur nga botimi gjerman “Spiegel”, duke cituar komentin e Schröder-Kim.

Duke iu përgjigjur pyetjes se çfarë saktësisht po bën ish-kancelari gjerman në Rusi, ajo tha: “Ai nuk është me pushime, por po zhvillon negociata për politikën energjetike në Moskë”.

Sipas “Spiegel”, Schröder mbërriti në Moskë të shtunën nëpërmjet Bakut dhe është planifikuar të largohet të martën.

Ai supozohet të zhvillojë negociata në lidhje me furnizimin me gaz rus përmes gazsjellësit “Nord Stream 1”.

Më herët, një zëdhënës i qeverisë gjermane deklaroi se zyra e kancelarit federal nuk ishte e përfshirë në udhëtimin e Gerhard Schröder-it në Moskë.

Nuk dihet se me kë do të bisedojë saktësisht Schröder, por më herët zëdhënësi i Vladimir Putin-it, Dmitry Peskov, nuk përjashtoi një takim mes ish-kancelarit gjerman dhe presidentit të Federatës Ruse.

Schröder ishte për herë të fundit në Rusi në muajin maj dhe foli me Putin-in për luftën në Ukrainë.

Ish-udhëheqësi gjerman e dënoi pushtimin si të pajustifikuar, por nuk e kritikoi Putin-in.

Ky qëndrim shkaktoi kritika të ashpra nga i gjithë spektri politik gjerman.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.