Greva mbarëkombëtare në Francë për planin e rritjes së moshës së pensionit në 64 vjeç

Në Francë, qindra mijëra protestues kanë dalë në rrugë teksa punonjësit e hekurudhave dhe stafi i rafinerisë filluan grevat dhe sindikatat rritën përpjekjet për të ndaluar planin e Emmanuel Macron për të rritur moshën e pensionit në 64 vjeç.

Sindikatat, për të gjashtën herë që nga fillimi i vitit, shpallën një ditë grevash dhe demonstratash mbarëkombëtare.

Shumë tubime proteste tërhoqën turma më të mëdha se ato të organizuara që nga mesi i janarit, duke përfshirë Marsejën, një nga qytetet më të mëdha të Francës.

Sindikatat e hekurudhave kërkuan greva të vazhdueshme, të pafundme, të cilat mund të prekin të gjithë trenat kombëtarë, si dhe linjat ndërkombëtare, përfshirë Eurostar.

Aksionit iu bashkuan grumbulluesit e koshave dhe shoferët e kamionëve.

Deri në mesditë, afërsisht 39 për qind e punëtorëve në operatorin shtetëror hekurudhor SNCF ishin në grevë – numri më i lartë që nga greva e parë kundër ndryshimeve të pensioneve më 19 janar.

Autobusët lokalë urbanë dhe trenat e metrosë në qytetet e mëdha u prekën, si dhe linjat ajrore, me deri në 30 për qind të fluturimeve të anuluara të martën dhe të mërkurën pasi kontrollorët e trafikut ajror ishin në grevë.

Rreth 24 për qind e punonjësve të sektorit publik ndaluan punën dhe shumë shkolla u mbyllën pasi mësuesit mbajtën një grevë njëditore. Disa studentë filluan të bllokojnë fakultetet të hënën.

Në greva morën pjesë edhe punëtorët e rafinerisë dhe energjetikës. Sindikata CGT ka thënë se dërgesat e karburantit nga rafineritë në të gjithë Francën ishin bllokuar që nga mëngjesi i së martës, gjë që mund të shkaktojë mungesë të stacioneve të karburantit nëse protestat vazhdojnë.

Propozimet e Macron-it për të rritur moshën e daljes në pension nga 62 në 64 vjeç dhe për të rritur numrin e viteve të punës që kërkohen për të kërkuar një pension të plotë po debatohen në senatin francez.

Macron ka mbetur i dëmtuar rëndë në frontin e brendshëm pasi grupimi i tij centrist nuk arriti të fitonte një shumicë absolute në zgjedhjet parlamentare qershorin e kaluar mes fitimeve për të djathtën ekstreme dhe të majtën radikale.

Pa një shumicë, qeveria duhet të mbështetet tek e djathta Les Républicains për të mbështetur ndryshimet e pensioneve, por senatorët dhe ligjvënësit e tyre po bëjnë presion për ndryshime.

Diskutimet parashikohet të përfundojnë në fund të marsit.

Pritet që një komision i përbërë nga ligjvënës nga të dy dhomat e parlamentit të kërkojë një marrëveshje të mundshme mbi një version të përbashkët të tekstit, që përfundimisht të paraqitet për miratim në Asamblenë Kombëtare dhe më pas në Senat.

Por tensionet mbeten për sa i përket nivelit të mbështetjes.

Qeveria është e vendosur të vazhdojë me ndryshimet e pensioneve dhe zëdhënësi i saj ka thënë se kishte çështje më të rëndësishme me të cilat përballet vendi sesa grevat, siç është kriza e kostos së jetesës.

Marrë nga “The Guardian”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.