Në qytetin e Prizrenit punëtorët e Eko Regjionit, gjatë gërmimit për të hapur një varr në varrezat myslimane të shtunën e 19 marsit kanë hasur në mbetje mortore të një kufome e cila ishte e mbështjellë me rroba si dhe një batanije.
Sipas raportit policor, dyshohet se mbetjet mortore i takojnë periudhës së luftës së fundit në Kosovë.
“Në vendin e ngjarjes kanë dalë njësitë përkatëse policore si dhe për rastin është njoftuar prokurori i shtetit”, thuhet më tej në raport.
Tërheqja e mbetjeve mortore është bërë nga njësia e krimeve të luftës, ka njoftuar policia.
23 vjet pas përfundimit të luftës në Kosovë, më shumë se 1 mijë e 600 persona figurojnë si të pagjetur.
Pas përfundimit të luftës në Kosovë, në vitin 1999, të zhdukur kanë qenë rreth 6 mijë 500 persona. Që nga ajo kohë janë kryer disa gërmime në varreza masive në Kosovë dhe Serbi dhe deri më tash janë gjetur rreth 70 për qind e të zhdukurve.
Gërmimet e fundit janë bërë në muajin maj, në varrezën masive në Kizhevak të Rashkës në Serbi, ku janë gjetur mbetjet mortore të nëntë kosovarëve, të vrarë gjatës luftës.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
