Flasin nga presidenca sllovene për AP: Dialogu përgjigjja për Asociacionin

Zyra për media e Presidentit të Sllovenisë, Borut Pahor, përmes një përgjigje me shkrim për Albanian Post, kanë thënë se kërkesa e Pahor drejtuar institucioneve të Kosovës që ta themelojnë Asociacionin e Komunave me Shumicë Serbe, mund të zbatohet vetëm përmes dialogut mes Kosovës dhe Serbisë.

“Presidenti i Republikës së Sllovenisë, Borut Pahor, gjatë një vizite të fundit pune në Kosovë, theksoi se ishte i vetëdijshëm për disa çështje të hapura lidhur me zbatimin e themelimit të Asociacionit të Komunave Serbe dhe se beson se dialogu është një përgjigje për të gjitha mosmarrëveshjet”, thuhet në përgjigjen e zyrës për media të Pahor për AP.

Megjithatë, nuk janë përgjigjur kur janë pyetur nga AP nëse ky qëndrim i Pahor vjen pasi me një korrik të këtij viti Sllovenia është udhëheqësja e radhës e Presidencës së Këshillit të Bashkimit Evropian.

Më 29 nëntor, Pahor pas takimit me presidenten e Kosovës, Vjosa Osmani, në Prishtinë theksoi se dy palët duhet të respektojnë marrëveshjet e arritura në kuadër të dialogut, përfshirë edhe formimin e Asociacionit të Komunave Serbe.

“Fillimi i dialogut ka dhënë një bindje që çështjet më të rëndësishme mund të zgjidhen me dialog dhe rrugë të qetë. Kushti i parë është që t’i besohet dialogut dhe të respektohen marrëveshjet”, tha ai

Ai potencoi se Sllovenia e mbështet dialogun në mes të Kosovës dhe Serbisë si dhe pret hapa konkrete në çështjen e personave të zhdukur.

“Duhet të tejkalohen mosmarrëveshjet në dialog dhe të ndikojmë në BE, dialogu nuk është i thjeshtë duhet të zgjidhen çështje shumë komplekse”, deklaroi tutje ai.

Pahor, ka deklaruar po ashtu se BE duhet t’ia liberalizojë vizat për Kosovën.

“Sllovenia e mbështet perspektivën euro atlantike të Kosovës, Sllovenia e ka pranuar subjektivitetin e Kosovës dhe ka marrëdhënie të shkëlqyera ekonomike dhe politike me të, Kosova duhet të jetë pjesë e BE-së”, ka thënë Pahor.

Sa i përket themelimit të Asociacionit, në një linjë me Slloveninë janë edhe shtetet e tjera të Bashkimit Evropian.

Zëdhënësi i Bashkimit Evropian, Peter Stano, ka kërkuar që Kosova dhe Serbia t’i zbatojnë të gjitha marrëveshjet e arritura në Bruksel, përfshirë edhe formimin e Asociacionit të Komunave me shumicë serbe.

“Duhet të bëjmë gjithçka që të zbatohet ajo çfarë është nënshkruar”, pati thënë Stano.

Por, kryeministri i Kosovës, Albin Kurti, në një intervistë për BBC-në pati deklaruar se  “Serbia po dëshiron bosnjëzimin e Kosovës” dhe është shprehur i bindur se nuk do të lejojë që kjo të ndodhë.

“Kur Asociacioni nuk u implementua, asnjë serb në Kosovë nuk protestoi. Ishte Beogradi që u zemërua”.

“Në vitin 1991, më 26 prill, 14 komuna me shumicë serbe në Bosnjë-Hercegovinë u bënë bashkë e krijuan Asociacionin. Më 9 janar 1992, e shpallën pavarësinë, më 28 shkurt 1992, e bënë Kushtetutën e tyre, më 14 dhjetor 1995 në Dejton arritën njohjen ndërkombëtare”.

“Duan ta përsëritin Bosnjën në Kosovë”, është shprehur Kurti.

“Nuk do ta lejoj këtë, pavarësisht nëse jam në opozitë apo qeveri”.

“Për këtë më votuan njerëzit, të parandaloj bosnjëzimin e Kosovës. Jam i bindur se me programin tonë, do të ndihmojmë serbët po aq sa shqiptarët”.

“Nëse pyesni serbët në Kosovë se cilat janë shqetësimet e tyre kryesore, ata thonë punësimi dhe drejtësia. Beogradi dëshiron të ketë shtet brenda një shteti. Shtetin e Serbisë brenda Kosovës së pavarur”, kishte thënë Kurti.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.