Edhe pse Këshilli për Arbitrazh Sportiv (KAS) që funksionon në kuadër të Komitetit Olimpik të Kosovës e ka miratuar ankesën e klubit të futbollit Prishtina, meqë klubi nga kryeqyteti nuk ishte licencuar nga FFK-ja për edicionin 2023/2024 të garave evropiane, kjo e fundit ka njoftuar se vendimi ka “parregullsi” të shumta.

“Federata e Futbollit e Kosovës (FFK) e ka pranuar me shqetësim vendimin e fundit të marrë nga Këshilli për Arbitrazh Sportiv (KAS) në kuadër të KOK-ut, i cili përmban parregullsi të shumta ligjore dhe procedurale”, thuhet fillimisht në njoftim, e ku pretendohet se vendimi i KAS-it nuk është nënshkruar nga të gjithë anëtarët e tij.

Sipas reagimit të FFK-së, këtë vendim nuk e ka nënshkruar Fisnik Salihu, i cili është anëtari më i kualifikuar për interpretime ligjore në arbitrazh sportiv në kuadër të këtij paneli.

“Kjo e bën të qartë se vendimi nuk përfaqëson qëndrimin e të gjithë anëtarëve të panelit dhe reflekton mosmarrëveshje të brendshme”, thuhet në reagimin e FFK-së.

“Vendimi është nënshkruar vetëm nga znj. Jehona Shyti, sekretare e z. Eroll Salihu dhe nga anëtari i KAS-it, i emëruar nga FC Prishtina. Kjo përbën konflikt interesi, pasi z. Salihu, i cili është shpesh i përfshirë në akuza ndaj FFK-së dhe aktualisht është në procedura gjyqësore kundër saj, ka caktuar si kryesuese të panelit sekretaren e tij, znj. Shyti”.

Po ashtu, në reagim FFK-ja thotë se “kemi vërejtur një ndikim të panevojshëm të individëve të përfshirë në KAS, në veçanti të Eroll Salihu, ish-sekretar i FFK-së, i cili vazhdimisht “ka ndërhyrë” dhe ka shfrytëzuar pozicionin e tij për të marrë vendime që e dëmtojnë FFK-në.

“KOK-u ka qenë i njoftuar për ndikimet e mundshme për shkak të z. Salihu, motivet e tij personale dhe mundësinë që ky proces të cenohet, por përkundër kësaj ka lejuar që KAS të marrë një vendim të kundërligjshëm. FFK, si një anëtare e përkushtuar e KOK-ut, ka ndihmuar në përparimin e sportit në Kosovë, zhvillimin e KOK-ut dhe anëtarëve të tjerë, dhe duke kontribuar vazhdimisht për zhvillimin e futbollit dhe sportit në përgjithësi”.

FFK-ja ka njoftuar se në ditët në vijim do të adresojë këtë vendim pranë institucioneve të drejtësisë në Kosovë përmes një Padie dhe Kallëzimi Penal, si dhe do të njoftojë Gjykatën e Arbitrazhit Sportiv (CAS) në Lozanë.

“Ky veprim synon të parandalojë që individë brenda KAS-it të Komitetit Olimpik të Kosovës të abuzojnë me autorizimet ligjore për qëllime të hakmarrjes ndaj ish-punëdhënësve të tyre dhe për të mbrojtur integritetin e drejtësisë sportive në vend”.

FC Prishtina nuk është licencuar pa të drejt nga FFK

Ndërkaq klubi i futbollit Prishtina përmes një njoftimi për media bëri të qartë së KAS të martën ka vendosur se ankesa e Prishtinës kundër FFK-së ishte e bazuar.

“FC Prishtina njofton se pas këtij vendimi të paligjshmen të Komisionit për Licencim të FFK-s për moslicencim të FC Prishtina, hapen rrugët ligjore për të kërkuar kompensimin e dëmit material, moral dhe prishjen e imazhit të klubit”, thuhej në njoftim të klubit kryeqytetas

Pjesëmarrja në gara evropiane sjell qindra mijëra euro për klubet e vendit. Deri më tani jo të gjitha vendimet e KAS-it janë zbatuar.

Ndërsa në vend të Prishtinës në garat evropiane në sezonin 2023/24 kishte marrë pjesë Dukagjini.

Salihu: Në KAS nuk blihen njerëzit

Por, në një përgjigje me shkrim për Albanian Post, ish-sekretari i përgjithshëm i Federatës së Futbollit të Kosovës (FKK), Eroll Salihu, ka theksuar se “në KAS nuk blihen njerëzit”, duke e mohuar se ka ndikuar në vendimin e KAS-it.

“Është rasti i dytë pas Dinamo. Asnjërin rast nuk kam qenë pjesë e as diskutimit dhe as nuk e kam caktuar kryetarin e panelit. Vet këshilli e ka bërë për shkak, ta quaj konflikt interesi, sepse nuk ka konflikt, pasi unë si kryetar nuk kam marrë pjesë në vendim”, tha Salihu.

Tutje, Salihu thotë se FFK-ja “po mundohen ta largojnë vëmendjen nga problemet e veta”.

“Të jeni të bindur se nuk e kam ditur as vendimin që është marrë, pasi është stërzgjatur ky proces”, shtoi ish-sekretari i FFK-së.

Ndryshe, Albanian Post ka raportuar se si përmes një sistemi korruptiv të sofistikuar, Agim Ademi, kryetar i FFK-s, u ka shpërndarë para nga buxheti i FFK-së biznesmenëve të ndryshëm të lidhur me të, familjarëve të tij, pronarëve të klubeve, përfaqësuesve të tifozëve të Kosovës e analistëve të ndryshëm që mbrojnë Ademin dhe udhëheqjen e tij në FFK në studio televizive.

Përmes të dhënave bankare që ka siguruar AP, dëshmohet se dhjetëra njerëz të afërt me Agim Ademin, kanë fituar para kundërligjshëm nga Shtëpia e Futbollit të Kosovës.

Po ashtu, AP ka raportuar për nepotizmin masiv që është bërë në Shtëpinë e Futbollit, e cila është shndërruar në një “çerdhe” ku punësohen gratë, djemtë e vajzat e zyrtarëve të lartë që punojnë aty.

Pas një hulumtimi të gjatë që ka bërë Albanian Post, ka kuptuar për disa nga emrat e familjarëve të zyrtarëve të FFK-së që janë sistemuar ndër vite.

Gjithashtu janë afër 40 mijë euro që Ademi u ka shpërndarë përgjatë vitit 2021, disa mediave të cilat në këmbim kanë bërë artikuj pozitiv për kreun e Shtëpisë së Futbollit të Kosovës.

FFK-ja ia bëri pa të drejtë “FC Prishtinës” – Ademi s’i blen dot njerëzit edhe në KAS