Ndonëse Mytaher Haskusa fitoi zgjedhjet komunale në Prizren në vitin 2017, sipas EXIT Poll-it të realizuar nga Albanian Post, tashmë ai rendidet i dyti.
Më i votuari sipas projeksioneve të AP-së del të jetë kandidati i Partisë Demokratike të Kosovës, Shaqir Totaj.
Sipas EXIT Poll-it të Albanian Post, Shaqir Totaj, i Partisë Demokratike të Kosovës, ka fituar garën zgjedhore në Prizren me 39.4% të votës së përgjithshme.
I dyti, ka dalë kryetari aktual i Prizrenit, kandidati i Lëvizjes Vetëvendosje, Mytaher Haskuka, me 35%.
Sipas të gjitha gjasave, deri në numërimin e fundit të votave, Prizreni shkon në balotazh, me Haskukën si kandidati i dytë, ndërsa Totaj i PDK-së i pari.
Përmbysja e madhe në Mitrovicë
Përmbysja e dytë e projektuar është Komuna e Mitrovicës së Jugut, ku projeksioni i shifrave del të jetë kolosal në krahasim me zgjedhjet e fundit lokale.
Bedri Hamza i Partisë Demokratike të Kosovës, ka përmbysur rezultatin në Mitrovicë duke dalë para kryetarit aktual nga Lëvizja Vetëvendosje, Agim Bahtiri.
Hamza madje, sipas rezultateve të EXIT POLL-it të Albanian Post, fiton pa balotazh me 57.9%.
I dyti është Bahtiri me 32.5%.
Përmbysja potenciale në Gjilan
Ndërsa përmbytja vjetër potenciale dhe mjaft e befasishme është Komuna e Gjilanit, e cila tradicionalisht ka qëndruar nën siglën e Lidhjes Demokratike të Kosovës, përkatësisht kryetarit aktual Lutfi Haziri.
Lutfi Haziri e ka humbur garën në raundin e parë sipas Exit Poll-it të Albanian Post.
Ai del vetëm i dyti me 41.4%, pasi në vendin e parë është pozicionuar Alban Hyseni me 48%.
Ndërsa, sipas projeksioneve të AP, edhe Prishtina del të jetë befasi, ndonëse jo përmbysje, ku kandidati nga Lëvizja Vetëvendosje, Arben Vitia, mund të shkon në balozath me kandidatin e LDK-së, Përparim Ramën.
Kandidati i Lëvizjes Vetëvendosje, Arben Vitia, përkundër pritjeve të partisë, nuk ka arritur ta fitojë garën qysh në raundin e parë, përkundër se ka dalur i pari.
Vitia ka arritur rezultat prej 44.5% për qind në Prishtinë.
I dyti është kandidati i Lidhjes Demokratike të Kosovës, Përparim Rama, me 26.5 %, derisa në vendin e tretë, me një rezultat të afërt me Ramën, është Uran Ismaili i Partisë Demokratike të Kosovës.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com