Evropa do të prodhojë 40 GW energji diellore deri në fund të vitit

Afro 40 GW (gigavat) energji diellore do të shpërndahen në të gjithë Evropën deri në fund të vitit.

Kjo, ndërsa kontinenti i vjetër përpiqet të përdorë burime të rinovueshme dhe të largohet nga gazi rus.

Lajmi u bë i ditur nga agjencia “SolarPower Europe” (SPE).

Kjo shifër është një rritje e konsiderueshme në krahasim me atë të vitit të kaluar prej 27 GW, në vetvete një rekord instalimi për një dekadë.

Pas pushtimit të Ukrainës nga Rusia dhe rritjes së çmimeve të energjisë që ka shkaktuar, qeveritë evropiane janë përpjekur të përshpejtojnë vendosjen e burimeve të rinovueshme si një mjet për të reduktuar varësinë e tyre nga importet ruse të energjisë.

SPE-ja shkruan se “armatizimi i furnizimit me energji” i Rusisë ka vendosur në vëmendje energjitë e rinovueshme në rajon këtë vit, me 39 GW shtesë diellore PV e barabartë me 4.6 BCM gaz rus.

“Çdo megavat energji e gjeneruar nga dielli dhe burimet e rinovueshme është më pak lëndë djegëse fosile që na duhen nga Rusia”, deklaroi Walburga Hemetsberger, CEO i SPE-së.

Më 18 maj, dhe në përgjigje të pushtimit rus të Ukrainës, BE-ja zbuloi Strategjinë e saj të përditësuar të BE-së për Energjinë Diellore.

Kjo, si pjesë e programit të saj të përgjithshëm REPowerEU, i cili synon 400 GW të energjisë diellore deri në vitin 2025 dhe pothuajse 740 GW deri në vitin 2030.

Ndërkohë, KE-ja ka propozuar rregullore që vendos një objektiv vullnetar për të ulur kërkesën për gaz me 15 për qind deri më 31 mars 2023.

Komisioni po ndjek praktikën e blerjes së përbashkët të gazit për të ulur kostot.

Plani “Kurseni gazin për një dimër të sigurt” do t’i jepte gjithashtu KE-së mundësinë për të deklaruar një reduktim të detyrueshëm të kërkesës për gaz pas konsultimit me shtetet anëtare nëpërmjet një “Alarmi të Unionit” për sigurinë e furnizimit.

Shqipëria

“Shqipëria po ndërton atë që do të jetë termocentrali më i madh diellor në Ballkan. Por kjo ka të bëjë me shumë më tepër sesa thjesht gjenerimin e këtyre elektroneve”.

Kështu e nis artikullin mbi Parkun Fotovoltaik – që mori jetë në Karavasta – gazetari i politikave klimatike pranë Brukselit, Sam Morgan.

Për të, ky termocentral do të ndihmojë në menaxhimin e burimeve më të mëdha hidroenergjetike, të cilat po bëhen më të pasigurta për shkak të ndryshimeve klimatike.

“Shqipëria gëzon më shumë orët me diell nga çdo vend në Evropë, kështu që është e vendosur në mënyrë ideale për të shfrytëzuar fuqinë e diellit”.

Javën e kaluar, kryeministri Edi Rama vuri gurthemelin e një termocentrali të ri diellor 140 megavat”, shkruan Morgan.

Firma franceze Voltalia – e cila ka instaluar më shumë se 1 gigavat energji të pastër në 20 vende të ndryshme – po ndërton centralin dhe planifikon ta bashkojë atë me rrjetin shqiptar deri në vitin 2023.

Panelet diellore do të jenë në gjendje të gjenerojnë energji të mjaftueshme për 220 mijë shtëpi – domethënëse për një vend me vetëm 2.8 milionë banorë – dhe elektronet e pastra do të kursejnë gati 100 mijë ton CO2 çdo vit.

Kjo është rreth 10 për qind e emetimeve industriale të Shqipërisë.

Por ndoshta më e rëndësishmja se kaq, termocentrali i ri do të ndihmojë Shqipërinë të zgjidhë një defekt të madh me sistemin ekzistues të energjisë së pastër dhe dobësitë e ndërtuara në burimet e saj hidroenergjetike.

Për Morgan, kjo do të thotë se Shqipëria do të jetë në gjendje të ruajë furnizimin e saj me ujë për përdorim kur është më e nevojshme, gjatë muajve të pikut të verës kur ka më pak reshje dhe kërkesa për energji rritet për shkak të ajrit të kondicionuar.

“Shqipëria jo vetëm që po përpiqet të përdorë burimet e saj natyrore për të luftuar rritjet e çmimeve, varësinë nga energjia dhe ndërprerjet e planifikuara, por po përpiqet të bëjë që menaxhimi i energjisë së prodhuar nga këto burime të funksionojë me efikasitet”.

Energjia diellore do të ndihmojë gjithashtu në balancimin e ambicieve hidroenergjetike të Shqipërisë me detyrimet e saj mjedisore.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.