Duka dhe Reja rreth eliminatoreve të Euro 2024: Skuadrat në grup nuk duhet nënvlerësuar, Evropiani është objektivi jonë

Shorti i Kualifikueseve të Kampionatit Evropianin të vitit 2024, që do të luhet në Gjermani, ka zbardhur sot rivalët e Shqipërisë, që është pozicionuar në Grupin E së bashku me Poloninë, Republikën Çeke, Moldavinë dhe Ishujt Faroe.

Në përfundim të shortit në Frankfurt ka dhënë një prononcim për mediat edhe Presidenti i Federatës Shqiptare të Futbollit, Armand Duka, i cili ishte i pranishëm në këtë ceremoni së bashku me trajnerin e Kombëtares, Edoardo Reja.

Duke folur për rivalët, Duka u shpreh se kualifikimi për në fazën finale është një objektiv real, por theksoi se skuadra duhet ta tregojë në fushë veten pasi nëse e merr lehtë mund të dështojë.

“Të gjitha skuadrat janë të mira, i pranueshëm. Grupi B dhe C ishin të vështirë, në grupin tonë mund të luhen ndeshjet dhe mund të bësh çdo rezultat. Është real objektivi për të qenë pjesë e Euro 2024. Nuk mund të mendosh nga shorti që je kualifikuar, por duhet të shohësh fushën. Kur kemi marrë shortin për Euro 2016, menduam se ishte i pakalueshëm, por ia dolëm”.

“Tani nëse mendojmë se është një grup i lehtë atëherë do të bëjmë më keq se më parë. Janë skuadra të forta, Polonia është pjesëmarrëse në Botëror, edhe Moldavia e Ishujt Faroe janë në rritje, – tha Duka, duke folur më tej edhe për diferencat në grup.

“Moldavia dhe Ishujt kanë diferencë nga Polonia e Çekia, po të ishin më të forta do të ishte më mirë, pasi objektivi i tyre tashmë do të jetë Shqipëria. Grupi me pesë është më pak impenjativ dhe nuk kam pishman për skuadrën e gjashtë për shkak të përfitimit financiar, e dëshiroja të ishim në një grup me pesë”, tha Presidenti i FSHF-së.

Në anën tjetër, për shortin e fazës eliminatore të Euro 2024 ka dhënë një koment edhe trajneri i përfaqësueses së Shqipërisë, Edoardo Reja, i cili u shpreh se kundërshtarët janë të vështirë dhe se kemi shanse për t’u kualifikuar, pasi shorti na shmangu përballjen me emra të mëdhenj të Evropës.

“Janë skuadra që i njohim, janë skuadra të vështira, por mund të përballemi me ta. Kemi mundësi të mira me të gjitha këto skuadra nëse do të jemi në gjendje të mirë dhe nuk do të kemi mungesa si kohët e fundit. Polonia është e fortë, kjo dihet, por do të garojmë me Çekinë për vendin e dytë”.

“Duhet të jemi të kënaqur me këtë grup, pasi kemi evituar emra të mëdhenj. Edhe Çekinë e njohim, pasi jemi përballur me ta në miqësore vitin e kaluar. Por, ne do të hasim vështirësi nëse do të luajmë si vitin e kaluar. Duhet të shmangim gabimet në ndeshjet e fundit”, tha Reja.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.