Diplomatët amerikanë do të kthehen gradualisht në Ukrainë

Gjatë një vizite larg syve të mediave në Kiev, sekretari amerikan i shtetit Antony Blinken dhe shefi i Pentagon-it Lloyd Austin njoftuan kthimin gradual të diplomatëve amerikanë në Ukrainë dhe emërimin e një ambasadori të ri.

Lajmi është raportuar nga agjenci të ndryshme, duke cituar burime, përfshirë “Reuters”, shkruan “Albanian Post”.

Diplomatët amerikanë u larguan nga ambasada në Kiev pothuajse dy javë përpara pushtimit të 24 shkurtit.

Kjo, duke zhvendosur disa funksione në Lviv dhe më pas duke u zhvendosur në Poloni.

Diplomatët amerikanë do të rifillojnë udhëtimet njëditore përtej kufirit në Lviv javën e ardhshme.

Zyrtarët kanë filluar të përshpejtojnë kthimin e diplomatëve në misionin e Kiev-it, sipas një zëdhënësi të Departamentit të Shtetit.

“Nuk ka asnjë zëvendësim për këtë komunikim personal dhe, natyrisht, kthimi në vend ka një kuptim simbolik”, tha zyrtari, i cili informoi gazetarët në Poloni në kushte anonimiteti.

Zyrtari tha gjithashtu se të hënën, presidenti amerikan Joe Biden do të emërojë zyrtarisht Bridget Brink, e cila aktualisht është ambasadorja e SHBA-ve në Sllovaki si ambasadore e SHBA-ve në Ukrainë. Ky pozicion mbeti vakant për dy vite.

Ndihmë ushtarake

Shtetet e Bashkuara njoftuan gjithashtu ndihmë të re ushtarake për Ukrainën.

Lajmi është bërë i ditur nga agjencitë perëndimore, duke cituar burime, përfshirë “Associated Press”, shkruan Albanian Post.

Sekretari amerikan i Shtetit, Anthony Blinken dhe Sekretari amerikan i Mbrojtjes, Lloyd Austin njoftuan një fond ushtarak prej 713 milionë dollarësh për Ukrainën dhe 15 aleatë të SHBA-ve.

Rreth 322 milionë dollarë janë dhënë për Kiev-in.

Pjesa tjetër do të ndahet midis anëtarëve të NATO-s dhe vendeve të tjera që i kanë ofruar Ukrainës furnizime të rëndësishme ushtarake që nga fillimi i luftës me Rusinë, thanë zyrtarët.

Një financim i tillë ndryshon nga ndihma e mëparshme ushtarake e SHBA-ve për Ukrainën.

Ky nuk është një donacion nga Departamenti i Mbrojtjes i SHBA-së, por para të gatshme që vendet mund t’i përdorin për të blerë furnizime që mund të kenë nevojë.

Sipas zyrtarëve, paratë, së bashku me shitjen e 165 milionë dollarëve në municione jo amerikane dhe sovjetike, rritin ndihmën totale ushtarake të SHBA-ve për Ukrainën në 3.7 miliardë dollarë që nga pushtimi rus.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.