Derek Chauvin, ish-oficeri i policisë në Minneapolis, duket se është në prag të pranimit të fajit për shkeljen e të drejtave civile të George Floyd.
Lajmi është bërë i ditur nga një njoftim i dërguar të hënën nga sistemi elektronik i dosjeve të gjykatës.
Deklarata federale tregon se një seancë është caktuar për të mërkurën për Chauvin për të ndryshuar deklarimin e tij aktual të pafajësisë në këtë rast. Këto lloj njoftimesh tregojnë se një i pandehur po planifikon të pranojë fajin.
Chauvin është dënuar tashmë për akuza për vrasje shtetërore dhe vrasje nga pakujdesia për shtrëngimin e qafës së Floyd-it me gjurin e tij, edhe pasi afriko-amerikani i tha se nuk mund të merrte frymë. Kjo ndodhi gjatë arrestimit më 25 maj 2020. Ish-oficeri në qershor u dënua nga gjykata e Minnesota-s me 22 vjet e gjysmë burg.
Arrestimi dhe vdekja e Floyd-it, të cilën një kalimtar i rastit e kapi në video me celular, ndezi protesta masive në mbarë vendin, që kërkonin t’i jepet fund pabarazisë racore dhe keqtrajtimit policor të njerëzve me ngjyrë.
Chauvin dhe tre ish-oficerë të tjerë – Thomas Lane, J Kueng dhe Tou Thao – do të dilnin në gjyq në fund të janarit me akuza federale ku pretendohej se ata kishin shkelur me dashje të drejtat e Floyd.
Informacioni i dërguar të hënën nuk jep asnjë tregues se oficerët e tjerë, përveç Chauvin, synojnë të pranojnë fajësinë.
Sipas provave në çështjen shtetërore kundër Chauvin-it, Kueng-i dhe Lane ndihmuan në frenimin e 46-vjeçarit Floyd ndërsa ai ishte në tokë – Kueng u gjunjëzua në shpinë të Floyd dhe Lane i mbajti këmbët Floyd-it. Thao ndaloi kalimtarët dhe i mbajti ata të mos ndërhynin gjatë shtrëngimit, që zgjati nëntë minuta e gjysmë.
Më shumë se 20 herë, Floyd përsëriti se nuk mund të merrte frymë. Ai u shpall i pajetë një orë më vonë në spital.
Të katër oficerët u akuzuan në gjykatën federale për privimin e Floyd-it nga të drejtat e tij, ndërsa vepronin nën autoritetin e qeverisë.
Një akuzë kundër Chauvin pretendoi se ai shkeli të drejtën e Floyd për të qenë i lirë nga sekuestrimi i paarsyeshëm dhe nga forca e paarsyeshme nga një oficer policie.
Nuk dihet nëse Chauvin planifikon të pranojë fajësinë për të gjitha ose vetëm për disa nga akuzat federale kundër tij në lidhje me vdekjen e Floyd-it.
Chauvin akuzohet gjithashtu në një aktakuzë të dytë, që rrjedh nga përdorimi i forcës dhe shtrëngimi në qafë i një djali adoleshent në vitin 2017.
Ajo aktakuzë pretendon se Chauvin e privoi djalin e atëhershëm 14-vjeçar, i cili ishte me ngjyrë, nga e drejta e tij për të qenë i lirë nga forca e paarsyeshme, kur ai e mbajti nga fyti.
Më pas e goditi në kokë me një elektrik dore dhe e mbajti gjurin e tij në qafën dhe pjesën e sipërme të shpinës së djalit, ndërsa ai ishte i shtrirë, i lidhur me pranga dhe nuk po bënte rezistencë.
Tre oficerët e tjerë u akuzuan gjithashtu në gjykatën shtetërore për ndihmë e nxitje për vrasje dhe vrasje. Për ata është planifikuar të shkojnë në gjyq për çështjen shtetërore në mars të vitit 2022.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Olsi Rama hedh poshtë akuzat e Bardhit për lidhjet me drogën: Vijnë nga një i paburrë
-
Rusia pëson sërish disfatë në OKB, dështon seanca për Kosovën
-
Xiaomi do të nxjerrë në treg automjetin e vet të parë elektrik
-
GJKKO i caktoi arrest në burg, Qato: Kam zbatuar ligjin, i keqardhur që SPAK ka rënë pre e presionit politik
Lajmet kryesore
-
Lufta kundër dezinformimit dhe ndërhyrjeve të huaja në Shqipëri, përmes një komisioni të posaçëm
-
SPAK firmos 9 masa sigurie, mes tyre 2 ish-zyrtarë të Bashkisë së Tiranës
-
Rusia vendos veto ndaj rezolutës së OKB-së për monitorimin e sanksioneve ndaj Koresë së Veriut
-
Rusia pëson sërish disfatë në OKB, dështon seanca për Kosovën