Jo rrallë herë, emri i Baletit Kombëtar të Kosovës, lakohet nëpër medie për suksese të arritura në këtë sferë të artit.
Madje, një sukses të ri, BKK e ka korrur edhe së fundmi, teksa është nderuar me “Çmimin e Ekselencës në Arte” në Washington DC të Shteteve të Bashkuara të Amerikës.
Baleti Kombëtar i Kosovës e fitoi këtë çmim me rëndësi të veçantë falë punës dhe arritjeve në fushën e artit, e të cilin e ndau Senati Amerikan.
Përmes një postimi në llogarinë e Facebook-ut, faqja zyrtare e Ministrisë së Rinisë, Kulturës dhe Sportit, ndau lajmin për fitoren e këtij çmimi.
“Jemi shumë të lumtur që SHBA po njeh punën, përkushtimin dhe vizionin artistik të Baletit Kombëtar të Kosovës. Shpresojmë që të hapen rrugët e bashkëpunimit, ndërsa sukseset e mëtutjeshme të mos u mungojnë”, thuhet në postim.
Ndryshe, me kërkesë të senatorit, z. Charles Schumer, flamuri amerikan u valëvit mbi ndërtesën e Kongreseve në Washington DC për nder të Kreshnik Musollit dhe Baletit Kombëtar të Kosovës.
Në anën tjetër, që prej lirimit e më pastaj dhe heqjes së masave anti COVID-19, BKK, është treguar mjaft aktive, sa i përket shfaqjeve të baletit.
“Sisters”, “Andërr”, “Entre dos Aguas” dhe “Troy Game”, janë vetëm disa nga shfaqjet e dhëna për artdashësit nga Baleti Kombëtar i Kosovës.
Ndryshe, me datë 24 qershor të këtij viti, pritet të jepet edhe shfaqja e baletit “Pristine Conditions”, vulën e koreografisë të së cilës e mban, Arthur Kuggeleyne, teksa për muzikën është përkujdesur, Christian Meyer.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
