Borrell për referendumin e Serbisë në Kosovë: Qytetarëve duhet t’iu lejohet e drejta për votim

Përfaqësuesi i Lartë për Politikë të Jashtme i Bashkimit Evropian, Joseph Borrell ka dalur pro mbajtjes së referendumit të Serbisë në Kosovë, edhe pse kryeministri i Kosovës, Albin Kurti nuk është pajtuar të mërkurën për këtë gjë.

Sipas tij, njerëzve duhet t’iu lejohet ushtrimi i të drejtës së tyre për votë, derisa ka theksuar se në të kaluarën ka qenë misioni i OBSE-së që të merret me ndërmjetësimin e grumbullimit të votave.

“Fola me Albin Kurtin dje lidhur me mbledhjen e votave në Kosovë për referendumin kushtetues të së dielës në Serbi. Mbledhja e votave në të kaluarën është bërë përmes lehtësimit të OSBE-së. Njerëzit duhet të jenë në gjendje të ushtrojnë të drejtën et yre për votë”, ka shkruar Borrell në Twitter.

Ai shtoi se, “referendumi në territorin sovran të një shteti tjetër nuk është praktikë e pranuar nga asnjë vend demokratik”.

Spoke to @albinkurti & @predsednikrs yesterday regarding the collection of votes in Kosovo for Sunday’s constitutional referendum in Serbia.
Collection of votes in the past has taken place through facilitation of the @OSCE. People should be able to exercise their right to vote.

— Josep Borrell Fontelles (@JosepBorrellF) January 13, 2022

Më 12 janar, Kryeministri i Kosovës, Albin Kurti, ka biseduar me telefon me Përfaqësuesin e Lartë të BE-së për politikë të jashtme, Josep Borrell për mundësinë e mbajtjes së referendumit të Serbisë në Kosovës.

“Në një telefonatë me Përfaqësuesin e Lartë të BE-së, Josep Borrell, ia përcolla qëndrimin tonë: Serbët në Kosovë të cilët kanë shtetësi të dyfishtë mund të votojnë në refereundimin e Serbisë nëpërmjet postës apo në Zyrën ndërlidhëse në Prishtinë. Një referendum në territorin sovran të një shteti tjetër nuk është praktikë e pranuar në asnjë vend demokratik”, ka shkruar Kurti në Twitter.

E ashtuquajtura “Zyra për Kosovë” në Qeverinë e Serbisë ka njoftuar se ka kërkuar nga ambasadorët e Quint-it, të Brukselit, si dhe nga përfaqësuesi special i Bashkimit Evropian (BE), Miroslav Lajçak, i cili është ndërmjetësues në dialogun mes Prishtinës dhe Beogradit, që të mundësojnë referendumin për ndryshime kushtetuese në Serbi të 16 janarit, të mbahet edhe në Republikën e Kosovës.

Kjo zyrë përmes një komunikate ka thënë se ua ka dërguar kërkesën diplomatëve për shkak se Prishtina nuk ka dhënë dritën “jeshile” për zhvillimin e procesit të referendumit edhe në territorin e Kosovës.

Ajo po ashtu ka deklaruar se me rastin e referendumit, më 16 janar, i ka dërguar kërkesë me kohë Misionit të OSBE-së në Kosovë që “në mënyrë operative të zhvillohet procesi i votimit në terren, gjegjësisht votimin në referendum të qytetarëve të Serbisë”, përcjell mediumi serb Danas.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.