Bllokohen 147 kg qese plastike njëpërdorimshme

Inspektorati Shtetëror i Mbikëqyrjes së Tregut (ISHMT), të mërkurën e 20 korrikut bllokoi 147 kilogramë qese plastike me trashësi më të hollë se 70 mikron.

Kjo u realizua në vijim të kontrolleve për zbatimin e vendimit të Këshillit të Ministrave “Për ndalimin e përdorimit të qeseve plastike mbajtëse dhe qeseve oxo-degradueshme dhe oxo-bio të degradueshme”.

Inspektorët e ISHMT-së sekuestruan të gjithë sasinë e këtij malli, si dhe vendosën masë administrative 500 mijë lekë ndaj subjektit.

ISHMT, si institucion zbatues i nismës së qeverisë për heqjen e qeseve plastike nga përdorimi iu bën apel të gjitha subjekteve të zbatojnë detyrimet ligjore që rrjedhin nga zbatimi i kësaj VKM-je, pasi kontrollet do të intensifikohen në të gjithë territorin e vendit.

Ky vendim përcakton se operatorët ekonomikë, që prej datës 1 Qershor,  ndalohen të përdorin ose ofrojnë qese plastike mbajtëse me përmasa më të vogla se 50 centimetra (cm) gjatësi dhe 24 cm gjerësi (pa përfshirë gjerësinë e palosjeve) me kapacitet mbajtës më të vogël se 10 kilogramë (kg), me trashësi nën 70 mikron.

Ndryshimet në ligjin “Për menaxhimin e integruar të mbetjeve” për ndalimin e përdorimit të qeseve plastike njëpërdorimshme, parashikojnë penalitete në rast mosrespektimi të kësaj VKM-je.

Në rastet kur subjektet nuk respektojnë kërkesat e përcaktuara në vendim, ISHMT ndalon tregtimin e qeseve plastike, procedon me sekuestrimin dhe marrjen e masave përkatëse.

Referuar vendimit, çdo person që hedh në treg, prodhon, importon ose fut në territorin e Republikës së Shqipërisë qese plastike mbajtëse, si dhe qese plastike mbajtëse të oxo-degradueshme apo të oxo-biodegradueshme, dënohet me gjobë në vlerën 500 mijë lekë dhe sekuestrimin e qeseve plastike të ndaluara.

Në rast se konstatohet se subjekti është gjobitur dhe më parë,  dhe shkelja e tij përsëritet masa ndëshkimore me gjobë  3-fishohet, i sekuestrohet malli dhe mund të shkohet deri në revokimin e lejes/licencës së prodhimit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.