Biden thotë se pandemia COVID-19 ‘ka mbaruar’

Presidenti amerikan Joe Biden ka thënë se “pandemia ka mbaruar” në një intervistë të transmetuar të dielën.

Kjo, megjithëse ai pranoi se “ne kemi ende një problem me COVID-in”, pasi SHBA-të vazhdojnë të përballen me infeksionet e Coronavirus-it që vrasin qindra amerikanë në ditë.

Lajmi u bë i ditur nga transmetuesi amerikan “CBS News”.

“Ne kemi ende një problem me COVID. Kemi ende shumë punë për të bërë. Por pandemia ka mbaruar. Nëse vini re, askush nuk mban maska. Të gjithë duket se janë në formë mjaft të mirë. Dhe kështu mendoj se po ndryshon”, deklaroi Biden për CBS.

Javën e kaluar Organizata Botërore e Shëndetësisë deklaroi se fundi i pandemisë ishte “i dukshëm”, pasi zbuloi se vdekjet javore ishin në nivelin më të ulët që nga marsi i vitit 2020.

Në SHBA, numri i pandemisë është zvogëluar ndjeshëm që nga fillimi i mandatit të Biden-it.

Por gati 400 njerëz në ditë vazhdojnë të vdesin nga COVID në SHBA, sipas Qendrave të SHBA-ve për Kontrollin dhe Parandalimin e Sëmundjeve.

Biden kaloi më shumë se dy javë duke u izoluar në Shtëpinë e Bardhë pas dy periudhave të COVID-it, duke filluar nga korriku.

Biden i ka kërkuar Kongresit 22.4 miliardë dollarë më shumë fonde për t’u përgatitur për një rritje të mundshme të rasteve në vjeshtë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.