Begaj takon presidentin zviceran, e quan komunitetin shqiptar atje një urë lidhëse mes vendeve

Presidenti i Republikës, Bajram Begaj, ka zhvilluar në New York një takim me homologun e tij zviceran, Alain Berset, ku kanë diskutuar për raportet mes vendeve, si edhe lidhjen e madhe që krijojnë shqiptarët, të cilët kanë vendosur të jetojnë në Zvicër.

Në takim u vlerësua niveli shumë i mirë i bashkëpunimit dhe i marrëdhënieve midis dy vendeve dhe u shpreh vendosmëria për forcimin e mëtejshëm të tyre, si dhe thellimin e bashkëpunimit në kuadër të organizatave ndërkombëtare.

“Komuniteti shqiptar në Zvicër është një urë lidhëse e fortë mes dy shteteve tona”, nënvizoi kreu i shtetit gjatë takimit.

Po ashtu, ai e falënderoi homologun zviceran për ndihmën e vazhdueshme dhe mbështetjen thelbësore të Zvicrës në zhvillimin e sektorëve të ndryshëm të ekonomisë në vendin tonë, në sektorin e energjisë, turizmit, shëndetësisë, në të cilën Zvicra renditet si donatori kryesor, duke ndihmuar në përmirësimin e sistemit shëndetësor dhe në hartimin e strategjisë kombëtarë për kujdesin parësor shëndetësor.

Një falënderim ka shkuar edhe për faktin se Shqipëria dhe Zvicra kanë nënshkruar një marrëveshje për sigurimet shoqërore mes vendeve, e cila do të bëjë të mundur njohjen e kontributeve në mënyrë reciproke, për qytetarët respektivë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.