Presidenti i Republikës së Shqipërisë, Bajram Begaj, deklaroi se Kosova ia ka dalë më së miri të respektojë e të nderojë zotimin që i bëri botës përmes firmëtarëve të pavarësisë.
Lajmi u bë i ditur gjatë aktivitetit të organizuar në Ambasadën e Kosovës në Tiranë, me rastin e 15-vjetorit të Pavarësisë së Kosovës.
“Në këto 15 vite, Kosova ia ka dalë më së miri të respektojë e të nderojë zotimin që i bëri botës, përmes firmëtarëve të pavarësisë, se ishte dhe do të jetë një faktor për paqen dhe stabilitetin në Evropën Juglindore”, u shpreh fillimisht kreu i shtetit.
Pjesëmarrës në takim ishin ish-presidenti Alfred Moisiu, ambasadori i Kosovës në Shqipëri, Skëndër Durmishi, si dhe ministre të kabinetit qeveritar.
“Kosova, shtet i lirë dhe i pavarur është përmbushja e amanetit të Ibrahim Rugovës dhe Adem Jasharit. Ishte fillimi i një epoke të re, ku shteti i Kosovës u projektua si një shtet modern, demokratik, që shihte nga e ardhmja, me një vullnet të palëkundur euro-atlantik”, vijoi Begaj në fjalën e tij.
Sipas tij, Republika e Kosovës si shtet sovran dhe i pavarur, ka demonstruar me fakte, pjekurinë dhe maturinë në qëndrimet e saj.
Për kreun e shtetit, lidhja vëllazërore e Shqipërisë me Kosovën është e natyrshme.
“Jemi një komb i ndarë në dy shtete, ndaj humbjet dhe fitoret, dhimbjet dhe sukseset, i kemi të përbashkëta”, shtoi Begaj.
Ai theksoi se Shqipëria ka mbështetur dhe do të vazhdojë të mbështesë Republikën e Kosovës, në anëtarësimin e saj në organizatat ndërkombëtare.
Ndër të tjera, presidenti garantoi se autoritetet shqiptare do të intensifikojnë maksimalisht përpjekjet për njohjet e mëtejshme të pavarësisë legjitime të saj.
“Mbështetja e pakursyer nga Bashkimi Evropian dhe Shtetet e Bashkuara të Amerikës, për ne dhe për të gjithë Ballkanin, është një garanci sa politike po aq dhe gjeografike se e ardhmja e vendeve të rajonit nuk është ajo e luftërave dhe ndasive, por e dialogut dhe bashkëpunimit”, vuri në dukje Begaj.
Kreu i shtetit e sheh të ardhmen e kombit shqiptar në familjen e madhe evropiane duke marrë shkas nga aplikimi i Kosovës në procesin për anëtarësim në BE si dhe kalimi i propozimit për liberalizimin e vizave.
Begaj solli gjithashtu në vëmendje se situata e krijuar së fundi në veri të Kosovës, ishte “një tregues i qartë se nuk kemi me kohë për të humbur”.
“Shqipëria mbështet dhe vlerëson dialogun mes Kosovës dhe Serbisë, me ndërmjetësimin e BE-së dhe mbështetjen e palëkundur të SHBA-së, për arritjen e një marrëveshje gjithëpërfshirëse, e cila do të duhet të fokusohet tek njohja e ndërsjellë dhe respektimi i minoriteteve”, deklaroi presidenti shqiptar.
Në përmbyllje Begaj ravijëzoi se gjatë këtyre 15 viteve, “Shqipëria ka parë me krenari lindjen dhe rritjen e shtetit të Kosovës”.
“Jam plotësisht i bindur se dhe në vitet në vijim, Shqipëria do të shohë me po aq krenari rrugëtimin euro-atlantik të shtetit të Kosovës; rrugëtim i cili do të përmbushë ëndrrën e çdo shqiptari brenda dhe jashtë trojeve tona”, tha Bajram Begaj, presidenti i Republikës së Shqipërisë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.comLajmet kryesore
-
Meta-Kryemadhi përballen kokë më kokë, për ‘familjen’ dhe partinë
-
Euronews Green: Shqipëria prodhon 100 % energji nga burime të rinovueshme
-
Sulm i dyshuar izraelit ndaj Iranit, SHBA mohon përfshirjen
-
Maqedonci: Situata është e qetë – jemi të përgatitur dhe të trajnuar për ta mbrojtur territorin tonë