BE-ja nuk është e plotë pa vendet e Ballkanit Perëndimor, thotë Von Der Leyen

Presidentja e Komisionit të Bashkimit Evropian, Ursula von der Leyen, ka thënë se BE-ja nuk është e plotë pa Ukrainën, Moldavinë, Gjeorgjinë dhe vendet e Ballkanit Perëndimor.

“Ju jeni pjesë e familjes sonë. Ju jeni e ardhmja e bashkimit tonë. Bashkimi ynë nuk është i plotë pa ju”, tha von der Leyen.

Republika Çeke, e cila aktualisht mban presidencën e rradhës të Këshillit të BE-së, duartrokiti menjëherë deklaratën e Von der Leyen.

Ministria e Punëve të Jashtme të Republikës Çeke e quajti atë një deklaratë të rëndësishme dhe, në të njëjtën kohë, theksoi se këto vende janë prioriteti i presidencës së saj.

“Deklaratë e rëndësishme se Ballkani Perëndimor, Ukraina, Moldavia dhe Gjeorgjia janë pjesë e familjes evropiane – ky është prioriteti i EU2022. Si dhe bashkëpunimi i ngushtë me fqinjët e gjerë, ne presim me padurim Samitin e Komunitetit Politik Evropian të 6-7 tetorit në Pragë”, shkroi Ministria në llogarinë e saj zyrtare në Twitter.

Këshilli i BE-së vendosi në fillim të qershorit t’i japë statusin e kandidatit Ukrainës dhe Moldavisë dhe tha se Gjeorgjisë gjithashtu do t’i jepet statusi pasi të përmbushen kriteret e kërkuara. Në samitin e mbajtur më 23 dhe 24 qershor, Këshilli i BE-së ftoi Komisionin të ndajë opinionet e tij për aplikimin për anëtarësim të Ukrainës dhe Moldavisë.

Përveç kësaj, i njëjti vuri në dukje se Gjeorgjisë, e cila aplikoi për statusin së bashku me Ukrainën dhe Moldavinë, do t’i jepet statusi i vendit kandidat pasi të zgjidhen dhe adresohen prioritetet e përmendura në opinionin e Komisionit.

Lidhur me Ballkanin Perëndimor, Këshilli tha në qershor se BE-ja shpreh angazhimin e saj të plotë dhe të qartë për perspektivën e anëtarësimit të Ballkanit Perëndimor dhe bën thirrje për përshpejtimin e procesit të anëtarësimit.

“Bazuar në metodologjinë e rishikuar, Këshilli Evropian fton Komisionin, Përfaqësuesin e Lartë dhe Këshillin që të avancojnë më tej integrimin gradual midis Bashkimit Evropian dhe rajonit tashmë gjatë vetë procesit të zgjerimit në një mënyrë të kthyeshme dhe të bazuar në merita”, deklaroi Këshilli.

BE ka nisur tashmë negociatat e anëtarësimit me Shqipërinë dhe Maqedoninë e Veriut. Shqipëria u bë një kandidate në BE në vitin 2014, ndërsa Maqedonia e Veriut u bë në 2005. Pavarësisht se Maqedonia e Veriut u bë kandidate përpara Shqipërisë, rruga e vendit drejt negociatave të anëtarësimit në BE është bllokuar nga autoritetet bullgare për shkak të çështjeve historike dhe gjuhësore.

Sa i përket Kosovës, Këshilli rikonfirmoi urgjencën e arritjes së përparimit të prekshëm në zgjidhjen e mosmarrëveshjeve dypalëshe dhe rajonale, veçanërisht në Dialogun Beograd-Prishtinë për normalizimin e marrëdhënieve ndërmjet Serbisë dhe Kosovës.

Përveç sa më sipër, Këshilli theksoi se në qershor është i gatshëm t’i japë statusin e vendit kandidat për Bosnjë-Hercegovinën dhe ftoi liderët politikë të kësaj të fundit që të zbatojnë me shpejtësi angazhimet e përcaktuara në marrëveshjen e arritur në 12 qershor 2022.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.