BE-ja, me ekip emergjence për sulmet kibernetike

Për trajtimin e sulmeve kibernetike në një shkallë të gjerë, Komisioni Evropian ka njoftuar planet për të ndërtuar një “Njësi të Përbashkët Kibernetike”.

Agjencia e lajmeve, BBC, tregon se komisioni e ka trajtuar këtë lëvizje në kuadër të incidenteve të fundit të sulmeve ransomware në shërbimet kritike në Irlandë dhe Shtetet e Bashkuara të Amerikës, të cilat kanë bërë që të “përqendrohen mendjet”.

Komisioni ka argumentuar se sulmet kibernetike ishin një kërcënim i sigurisë kombëtare, pasi incidentet në Evropë u rritën nga 432 në vitin 2019 në 756 në vitin 2020.

Gjatë sulmeve serioze, pritet që në vendet evropiane të vendoset me shpejtësi një ekip i përkushtuar i ekspertëve kibernetikë shumë-kombëtarë.

Nënkryetari i Komisionit Evropian Margaritis Schinas, është shprehur se sulmi i muajit të kaluar mbi furnizimet e karburanteve në SHBA ishte “skenari i makthit ndaj të cilit duhet të përgatitemi”.

Një bandë kriminale kibernetike e quajtur Darkside, gjatë muajit të kaluar, ka detyruar që Gazsjellësi Kolonial të dalë jashtë linje për gati një javë, duke shkaktuar blerje paniku dhe mungesa të karburantit.

Për sa i përket, hacker-ave ransomware, ata përdorin software me qëllim të keq për të marrë dhe vjedhur të dhënat kompjuterike të një organizate. Kjo duke akuzuar viktimat për të kthyer shërbimet në normalitet.

Kohët e fundit, qeveria e SHBA-së ka formuar një “Task Forcë Ransomware”, ndërsa Qendra Kombëtare e Sigurisë Kibernetike e Mbretërisë së Bashkuar ka paralajmëruar se ransomware-i është kërcënimi më i madh kibernetik për vendin.

Ndërkohë, Komisioni Evropian ka deklaruar se sulmi i vazhdueshëm ransomware ndaj shërbimit shëndetësor të Irlandës është një tjetër shenjë që sulmet kibernetike janë një çështje e sigurisë kombëtare.

Në Irlandë, Shërbimi Shëndetësor Ekzekutiv (HSE) u godit nga një grup ransomware i quajtur Conti, i cili përzjeu sistemet e IT-së, duke shkaktuar përçarje të mëdha në shumë spitale.

Paul Reid, shefi i HSE-së, i tha komitetit shëndetësor, Oireachtas, se do të duhen muaj për të rregulluar sistemin.

Gjithashtu ka zbuluar se ky rregullim do të kushtojë deri në 100 milionë euro për të rimarrë veten dhe do të ketë “kosto njerëzore” të mëdha.

Komisioneri i Bashkimit Evropian për tregun e brendshëm, Thierry Breton, ka njoftuar se ekipet e Reagimit të Shpejtë të Njësisë së Përbashkët Cyber, ​​mund të kishin ndihmuar Irlandën të rikuperohej nga kriza.

Sipas tij, njësia do të ndihmonte në skenarë të ngjashëm, duke “vendosur shumë shpejt një ekip të përkushtuar, të cilin nuk kemi kapacitet ta bëjmë tani. Ne e dimë që, sa më gjatë të presësh aq më keq është, sa më shpejt dhe sa më shumë solidaritet është ajo që mund të pritet”.

Breton-i ka këmbëngulur se njësia e re nuk do të konkurrojë me entet kibernetike kombëtare.

Ai ka premtuar të ndërtojë një ekip për të siguruar mbështetje, virtualisht dhe fizikisht, duke përdorur burime “nga një vend në tjetrin”. Kjo për të ofruar ndihmë operacionale dhe teknike.

BBC shkruan se qëllimi është të sigurohet që “Njësia e Përbashkët Kibernetike” do të jetë operacionale deri në muajin qershor të vitit të ardhshëm dhe se ajo do të krijohet plotësisht një vit më vonë, deri më 30 qershor të vitit 2023.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.