5000 pemë të shkulura në fshatrat palestineze të Bregut Perëndimor në më pak se pesë muaj

Rreth 5 mijë pemë në dhjetëra fshatra palestineze në Bregun Perëndimor u vandalizuan në më pak se pesë muaj, sipas të dhënave nga Kombet e Bashkuara që u mblodhën deri në fund të prillit dhe nga raportet e banorëve lokalë nga java e kaluar.

Vandalizimi përfshin prerjen e pemëve kryesisht ullinj, këputjen dhe çrrënjosjen e tyre në zonat e Bregut Perëndimor nën kontrollin e plotë të sigurisë izraelite.

Këto akte kanë ndodhur në mënyrë të përsëritur që nga mesi i viteve 1990 dhe fermerët palestinezë janë të sigurt se vandalët janë hebrenj izraelitë që jetojnë ose vizitojnë vendbanimet.

Zyra e OKB-së për Koordinimin e Çështjeve Humanitare (OCHA) publikon çdo dy ose tre javë një përmbledhje të incidenteve të dhunshme që kanë ndodhur në Bregun Perëndimor dhe në Rripin e Gazës.

Bazuar në raportet nga burimet palestineze, që nga 20 dhjetori 2022 deri në fund të prillit 2023, OCHA renditi 84 incidente në të cilat individë të panjohur vandalizuan mbi 4 mijë pemë që i përkisnin palestinezëve në të gjithë Bregun Perëndimor.

Raportet e OKB-së përfshijnë sulme të tjera të dhunshme nga izraelitët kundër palestinezëve dhe pronës së tyre, të cilat në katër muajt e parë të vitit 2023 numëruan 352 incidente, duke përfshirë 95 raste të lëndimeve trupore.

Për krahasim, në vitin 2022 OKB-ja raportoi 849 sulme të kolonëve, nga të cilët 228 përfshinin dëmtime fizike ndaj njerëzve.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.