Pamjet e raportuara nga Albanian Post tregojnë togën e Forcave të Ndërhyrjes së Shpejtë të cilat kanë nisur të shpërndajnë turmën duke hedhur gaz lotsjellës në drejtim të studentëve dhe gjimnazistëve të cilët kanë zgjedhur të bojkotojnë mësimin edhe të enjten.
Sipas pamjeve të raportuara nga Albanian Post, mjetet e rënda përfshirë autobotet e ujit qëndrojnë në krah të Ministrisë së Arsimit, e cila është kthyer në fushëbetejë tre ditët e fundit në përballjen mes protestuesve dhe Policisë së Shtetit.
Protestuesit kanë hedhur gurë në drejtim të Ministrisë së Arsimit, ndërsa Policia ka përdorur gaz lotsjellës për të shpërndarë turmën.
Pas ndërhyrjes së Policisë, të rinjtë kanë nisur të vrapojnë për t’u larguar nga zona.
Uniformat blu kanë bërë dhe shoqërimet e para.
Studentët e Fakultetit të Gjuhëve të Huaja në Shkodër kanë bojkotuar mësimin dhe kanë dalë në protestë në shenjë solidariteti me studentët që po protestojnë në Tiranë.
Protesta nisi në ambientet e Fakultetit të Gjuhëve të Huaja, nga ku studentët marshuan drejt Bashkisë së Shkodrës dhe më pas u ndalën para godinës së Rektoratit të Universitetit “Luigj Gurakuqi”.
Gjatë tubimit para Rektoratit, studentët shprehën pakënaqësinë e tyre përmes thirrjeve “Turp!”, ndërsa disa prej tyre qëlluan me vezë derën e godinës.
Studentët deklaruan se do të vijojnë protestat, duke riafirmuar solidaritetin me protestuesit në kryeqytet.
Bojkoti dhe tubimi në Shkodër i bashkohen kështu reagimeve të studentëve jashtë Tiranës në mbështetje të lëvizjes studentore.
