Kosova voton

Kryetari i Lidhjes Demokratike të Kosovës, Lumir Abdixhiku, ka shfrytëzuar të drejtën e tij të votës në Prishtinë i shoqëruar nga bashkëshortja e tij.

Në një prononcim të shkurtër për media, Abdixhiku tha se çdo votë ka rëndësi duke ftuar kështu qyetarët që të dalin sa më masovikisht në zgjedhjet e jashtëzakonshme parlamentare të 7 qershorit.

“Janë të gjitha kushtet që populli i Kosovës të vendos fatin për katër vitet e ardhshme  Çdo votë ka rëndësi dhe në këtë drejtim pres pjesëmarrje masive”, tha ai.

Sipas tij zgjedhjet janë festë për popullin e Kosovës.

“Janë festë e demokracisë e shprehjes së lirë e vullnetit të popullit”.

Veton Berisha akuzon Elbert Krasniqin për ndërhyrje në procesin zgjedhor

Kryetari i Partisë Liberale Egjiptiane, Veton Berisha, ka denoncuar në Policinë e Kosovës ministrin në detyrë të Administrimit të Pushtetit Lokal, Elbert Krasniqi, duke e akuzuar se po ndikon te qytetarët.

Sipas Berishës, Krasniqi së bashku me sigurimin e tij kanë qëndruar në fshatin Brestovik të Pejës, vendbanim i banuar nga komuniteti egjiptian.

“Sot në orën 08:15 kam marrë telefonata nga fshati Brestovik në Komunën e Pejës, i cili është vendbanim i banuar me komunitetin egjiptian. Në atë kohë është parë ministri në detyrë me veturë zyrtare dhe me sigurimin personal. Për këtë rast kam siguruar pamje. Ky veprim është i papranueshëm. Prezenca e tij ka të bëjë me pengimin e daljes së njerëzve për të votuar. Konsideroj se është shkelje e procesit zgjedhor dhe e kodit të sjelljes në ditën e votimit”, ka thënë Berisha.

Kandidati i Partisë Demokratike të Kosovës, Bedri Hamza, të dielën ka ushtruar të drejtën e tij të votës në Komunën e Mitrovicës, i shoqëruar nga bashkëshortja e tij.

Në një prononcim të shkurtër për media Hamza kërkoi që qytetarët të shfrytëzojnë të drejtën e tyre dhe të dalin sa më masivisht të votojnë.

Sipas tij qytetarët më 7 qershor vendosin për të ardhmen e tyre për katër vjetët e ardhshme.

“I ftoj të gjithë qytetarët e Kosovës me e shfrytëzua këtë të drejtë me dal me votu, me votu sipas bindjeve të tyre politike, me votu në mënyrë të lirë të qetë në mënyrë demokratike”.

Gjini: Qytetarët ta marrin Kosovën në duart e tyre

Kryetari i Aleancës, Ardian Gjini, ka ftuar të gjithë qytetarët që të dalin dhe të votojnë.

Gjini para gazetarëve ka thënë se është koha që qytetarët ta marrin në duart e tyre vendin.

“I ftoj qytetarët e Kosovës që të dalin dhe të votojnë dhe ta marrin Kosovën në duart e veta. Kosova i përket vetëm qytetarëve dhe ata duhet ta japin fjalën e tyre sot. Urime të gjithëve, shpresoj që në këto zgjedhje të sjellim ditë më të mira për vendin”, ka deklaruar ai.